Бзылъфыгъэхэм я Дунэе мафэ ихэгъэунэфыкIын къыды­хэлъытагъэу Адыгеим щыпсэухэрэм ыкIи къеблэгъэщт хьа­кIэхэм музыкальнэ марафонхэр, флешмобхэр, нэмыкI Iоф­тхьабзэхэр афагъэхьазырыгъэх.

Мыекъопэ къэлэ администрацием культурэмкIэ и ГъэIорышIапIэ къызэритыгъэмкIэ, мэфэкI Iоф­тхьабзэхэр гъэтхапэм и 9-м нэс кIощтых, коронавирусым епхыгъэ гъунапкъэхэр къадыхэлъытэгъэщтых.

Гъэтхапэм и 3 — 8-м марафонэу «Ным иорэд» зыфиIорэр щыIэщт. МэфэкI концерт программэр къэзыгъэхьазырыщтхэр кIэлэцIыкIу орэдыIо купхэу «Радуга», «Шпаргалка», «Звонница» зыфи­Iохэрэр, станицэу Ханскэм дэт культурэм и Ун.

Проектэу «Гъогу артист» зыфиIорэм къыды­хэлъытагъэу, гъэтхапэм и 7-м концертэу «Для Вас, любимые женщины!» зыфиIорэм шъуеплъын шъу­лъэкIыщт. Культурэм и Унэу «Гигантым» ыпа­шъхьэ ар щыкIощт. Мафэм сыхьатыр 3-м ра­гъэжьэщт.

Гъэтхапэм и 8-м творческэ купхэм къагъэхьазы­рыгъэ флешмобыр Лениным ыцIэ зыхьырэ гупчэм къыщагъэлъэгъощт. Мы мэфэ дэдэм «Гигантым» инстаграмым щыриIэ нэкIубгъоу «@gdk_gigant» зыфиIорэм щы­кIощт творческэ мастер­-классым шIоигъоныгъэ зиIэхэр хэлэжьэнхэу амал яIэщт.

Дунэе Iофтхьабзэу «Вам, любимые!» зыфи­Iорэм къыдыхэлъытагъэу, Мыекъуапэ, Ханскэм ыкIи Гавердовскэм адэт культурэм иунэхэм мас­тер-классхэр, къэгъэлъэгъонхэр ащыкIощтых. Усэхэр зикIасэхэри щызэрэугъоищтых.

МэфэкI Iофтхьабзэхэр гъэтхапэм и 9-м аухыщтых. Творческэ купэу «Ошъадэм» къыгъэхьазырыгъэ концерт программэу «Для милых мам!» шъуеплъын шъулъэкIыщт.