АР-м и ЛIышъхьэ Джэджэ районым зэкIом, ащ иактив зэIукIэгъу ды­­риIагъ. ТапэкIэ муниципальнэ образованием хэхъоныгъэхэр ышIын­хэм пае анаIэ зытетын фаехэм ар афэгъэхьыгъагъ.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Премьер-министрэу Геннадий Митрофановыр, АР-м и ЛIышъхьэ ыкIи министрэхэм я Кабинет я Администрацие ипащэу Владимир Свеженец, нэмыкIхэр.

Пстэумэ апэу Андрей Тарану­хиным район администрацием ипащэ зэрэхъугъэр къэзыушыхьа­тырэ тхылъыр ратыжьыгъ. Ар народнэ депутатхэм ярайон Совет мэзаем и 25-м я 49рэ зэхэсыгъоу иIагъэм щыха­дзыгъ.

АР-м и ЛIышъхьэ пэщакIэм фэгушIуагъ.

— ШIэгъэн фаер бэ, — къы­Iуагъ республикэм ипащэ. —Муниципалитетым хэхъоныгъэ­хэр зэришIыхэрэр лъыгъэкIотэгъэн, экономикэри, социальнэ лъэныкъори нэмыкI лъэгапIэхэм анэгъэсыгъэн фае. Пшъэрылъ шъхьаIэр къуаджэр къэлэ щы­IакIэм пэблагъэ шIыгъэныр ары. Ар УФ-м и Президент къыгъэ­нафэхэрэм зэу ащыщ.

АР-м и ЛIышъхьэ зэпахырэ узэу дунаир зэлъызыкIугъэм экономикэмрэ социальнэ лъэныкъомрэ иягъэу аригъэкIырэр нахь макIэ шIыгъэным пае, неущырэ мафэмкIэ нахьыбэу гугъапIэ къэзытырэ лъэныкъо­хэм анаIэ атырагъэтыным мэхьанэ зэриIэм къыкIигъэтхъыгъ.

УФ-м и Правительствэ и Тхьаматэу Михаил Мишустиныр адыгэ къуаем икъыдэгъэкIын анахьыбэу зезгъэушъомбгъурэ хъызмэтшIапIэу «Тамбовский» зыфиIорэм къызэрэкIогъагъэм республикэм ипащэ игугъу къы­шIыгъ. Премьер-министрэм къуаер бэдзэршIыпIэм щылъыгъэкIотэгъэнымкIэ Iофэу зэ­шIуа­хырэм осэ ин къыфишIыгъ.

КъумпIыл Мурат зэрилъы­тэ­рэмкIэ, республикэм ибренд идэгъугъэ зэщымыкъоныр ­ады­гэ къуаер къыдэзыгъэкIыхэрэм я Ассоциацие пшъэрылъ шъхьаIэу иIэхэм ащыщ. Щэ бэу къэзытырэ былымэу республикэм ща­Iыгъыр нахьыбэ шIыгъэными мэ­хьанэшхо иI.

— Адыгэ къуаеу къыдэдгъэ­кIырэм хахъомэ, былымхъуным, зекIоным язегъэушъомбгъун, промышленностым хэхъоны­гъэхэр ышIынхэм афэIорышIэщт. А зэпстэумэ инвесторэу Адыге­им къихьэрэр нахьыбэ хъунымкIэ шIуагъэ къатыщт, — къыIуагъ АР-м и ЛIышъхьэ. Республикэм ипащэ мэкъу-­мэщым щылажьэхэрэм IэпыIэгъоу аратырэр зэрэлъагъэкIотэщтым къыкIигъэтхъыгъ, къэ­ралы­гъо программэхэм амалэу къа­тырэ пстэур агъэфедэнэу райо­ным ипащэ пшъэрылъ фи­шIыгъ.

УФ-м и Премьер-министрэ Адыгеим къызэкIом, къоджэ псэупIэхэм хэхъоныгъэхэр ягъэ­шIыгъэнхэм фытегъэпсыхьэгъэ программэм къыдыхэлъытагъэу ахъщэ тедзэу сомэ миллиард ныкъо фэдиз Адыгеим джыри къыфатIупщыщтэу къыIуагъ. А ахъщэр Джэджэ районым изегъэушъомбгъун, социальнэ Iоф­хэр нахьышIу шIыгъэнхэм апа­Iуагъэхьащт.

БлэкIыгъэ илъэсым зэпахырэ узым ыпкъ къикIыкIэ, гъу­нэпкъэ гъэнэфагъэхэр щыIа­гъэхэми, лъэпкъ проектхэм, хэу­шъхьафыкIыгъэ программэм, нэмыкIхэм къадыхэлъытагъэу агъэнэфагъэхэр зэкIэри зэрагъэцэкIагъэхэр АР-м и ЛIышъхьэ къыхигъэщыгъ.

— Инвесторэу къихьэхэрэм административнэ пэрыохъоу яIэр нахь макIэ хъуным, проектхэм япхыгъэ тхылъхэм ягъэ­хьазырын къызэрыкIо афэшIыгъэным тынаIэ тет, фэгъэкIотэн зэфэшъхьафхэр, къэралыгъо IэпыIэгъур апэтэгъохых, — къы­Iуагъ КъумпIыл Мурат.

Социальнэ Iофхэм хэушъхьафыкIыгъэу атегущыIагъэх. На­хьыпэрэм фэдэу ахэм анахьыбэу анаIэ зэратырагъэтыщтым АР-м и ЛIышъхьэ къыкIигъэт­хъыгъ.

— Къэралыгъом амалэу къа­ритырэм цIыфхэр щыгъозэнхэ фае. Владимир Путиныр кIэщакIо зыфэхъугъэ Лъэпкъ проектхэр зэкIэри ахэм ящыIакIэ нахьышIу шIыгъэным фы­тегъэпсыхьагъэх, — къыIуагъ КъумпIыл Мурат.