2021-рэ илъэсым, гъэтхапэм и 21-м, адыгэхэм шэнышIу зэрафэхъугъэу, ИлъэсыкIэ мэфэкIыр игъэкIотыгъэу хагъэунэфыкIыщт.

Адыгэ Республикэм культу­рэмкIэ и Министерствэ, респуб­ликэм лъэпкъ культурэмкIэ и Гупчэ «ИлъэсыкIэ мэфэкI» зыфиIорэ Iофтхьабзэр зэхащэ.

Республикэм и Къэралыгъо программэу «Культурэм хэхъоны­гъэ ышIыныр» зыфиIорэр щыIэныгъэм щыпхыращызэ, лъэпкъ шэн-хабзэхэр къэIэтыжьыгъэнхэм, лIэужхэм язэпхыныгъэ гъэпытэгъэным, шIэжь яIэу ныбжьыкIэхэр пIугъэнхэм афэгъэхьыгъэ Iофхэр агъэцакIэх. Республикэм лъэпкъ культурэмкIэ и Гупчэ ипащэу Бадый Къэплъан къызэриIуагъэу, пэсэрэ лъэхъаным къыщегъэжьагъэу адыгэхэм яшэн-хабзэхэр къаухъумэх. Зэхахьэу зэхащэ­хэ­рэр лъэхъаным дештэх, гупшысэу ахэлъыр пIуныгъэм къыпкъырэкIы.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ехьылIэгъэ Iофтхьабзэхэу 2021-рэ илъэсым зэхащэщтхэм «ИлъэсыкIэ мэфэкIыр» зэу ащыщ.

«Нанэм» щызэхащэщт

Лъэпкъ культурэм иIофшIапIэу «Нанэм» ИлъэсыкIэм фэгъэ­хьыгъэ мэфэкIыр щызэхащэщт. Мыекъуапэ хэхьэрэ псэупIэу Хьакъунае (къутырэу Гавердовскэр) IофшIапIэу «Нанэр» дэт, ащ ипащэр Нэгъуцу Аслъан.

ИлъэсыкIэ мэфэкIыр, культу­рэмрэ искусствэмрэ якъэгъэ­лъэгъонхэр, студентхэм, ныбжьыкIэхэм язэIукIэгъухэр, лъэпкъхэм язэхахьэхэр «Нанэм» щэкIох.

— ТиIофшIапIэ къызэрэхахыгъэр, ИлъэсыкIэр зэрэщагъэмэ­фэ­кIыщтыр тигуапэ, — къыти­Iуагъ Нэ­гъуцу Аслъан. — Зэхахьэм лъэпкъ зэфэшъхьафхэр зэрэщызэIукIэщтхэм тегъэгушIо.

Адыгэ Хасэр, къэзэкъхэр…

ШэнышIу зэрэхъугъэу, адыгэ­хэм я ИлъэсыкIэ мэфэкI респуб­ликэм иобщественнэ движениехэм ялIыкIохэр щызэIукIэщтых. Мыекъопэ къэзэкъ отделым ипа­щэу Александр Даниловым тыщигъэгъозагъ зэIукIэгъоу яIагъэм ИлъэсыкIэ мэфэкIым зэрэхэлэжьэщтхэм зэрэщытегущыIагъэхэр.

— Узыдэпсэурэ лъэпкъым ита­рихъ, ишэн-хабзэхэр нахьы­шIоу зызэбгъашIэхэкIэ, лъытэ­ныгъэу фэпшIырэм хэхъощт, — еIо Александр Даниловым.

— Зичэзыу зэIукIэу гъэцэкIэ­кIо купым иIагъэм адыгэхэм я Илъэ­сыкIэ мэфэкI зэрэкIощт шIыкIэм тыщытегущыIагъ, — къытиIуагъ республикэ общественнэ дви­жениеу «Адыгэ Хасэм» итхьаматэу ЛIымыщэкъо Рэмэзан. — Адыгабзэм изэгъэшIэн, игъэфедэн, лъэпкъ шIэжьым изыкъе­гъэIэтын тиеплъыкIэхэр къят­IолIагъэх. МэфэкIым адыгабзэкIэ тыщыгущыIэщт, орэд къыщаIощт, щыуджыщтых.

Къэндзалхэр, ермэлхэр, фэшъхьаф лъэпкъхэри ИлъэсыкIэ мэфэкIым щызэIукIэщтых. Iэпэ­Iасэхэм яIофшIагъэхэр къыща­гъэлъэгъощтых.

ГущыIэ щэрыохэр

ЗэлъашIэрэ археологэу, ­Адыгэ Республикэм и Лъэпкъ музей шIэныгъэмкIэ иIофышIэ шъхьаIэу, Адыгэ Хасэм хэтэу Тэу Ас­лъан ижъырэ адыгэ гущыIэжъхэм яхьылIэгъэ къэбархэр къыIотэщтых. ГущыIэ щэрыохэм лъапсэу яIэм тащигъэгъозэщт.

— ИлъэсыкIэ мэфэкIым хъохъу гущыIэхэр къыщытIонхэр шэнышIу тфэхъугъ, — къеIуатэ Тэу Ас-лъан. — Тиадыгэ гущыIэжъхэр щэрыох, купкI ин яI.

Хьалыжъор, щэламэр…

Iанэр шэпхъэ хэхыгъэм диштэу мэфэкIым къыщызэIуахыщт. Адыгэ шхыныгъохэу хьалыжъор, щэламэр, нэмыкIхэри Iанэм щыт­лъэгъущтых.

Лъэпкъхэр зэфэзыщэрэ мэфэ­кIыр гъэшIэгъонэу кIощт. Къэралыгъо гъэпсыкIэ иIэу Адыгеир зыпсэурэр илъэси 100 зэрэ­хъу­рэм ипэгъокIэу нэмыкI лъэпкъ мэфэкIхэри зэхащэщтых.