КIэлэцIыкIу IыгъыпIэу N 7-м икъутамэу Кобл Якъубэ ыцIэ зыхьырэ урамым къыщызэIуахыгъэм иIофшIэн ригъэжьагъ, сабыйхэр аштэнхэу аублагъ.

Къэлэ администрацием ипресс-къулыкъу къызэ­рэщаIуагъэмкIэ, лъэпкъ проектэу «Демографием» къыдыхэлъытагъэу мы кIэлэцIыкIу IыгъыпIэм ишIын 2019-рэ илъэсым аублэгъагъ. ПсэупIэм ишIын, Iэмэ-псымэхэм ящэфын федеральнэ ыкIи шъолъыр бюджетым къы­хэхыгъэ сомэ миллион 719-рэ пэIуагъэхьагъ.

— Адыгэ Республикэм и ЛIышъхьэу КъумпIыл Мурат пшъэрылъэу къыгъэуцугъэм диштэу ­лъэпкъ проектхэр щыIэныгъэм щыпхырыщыгъэнхэм ана­хьэу тынаIэ тет. КIэлэ­цIыкIу IыгъыпIакIэр щыIэ зэ­рэхъугъэм ишIуагъэкIэ чэзыум хэтхэр нахь макIэ хъугъэх, — къыIуагъ къэлэ администрацием ипащэу Андрей Гетмановым.

КIэлэцIыкIу IыгъыпIэр аужырэ шапхъэхэм аде­штэ, кIэлэцIыкIухэр зыщыджэгущтхэ, зыщычъыещтхэ, зызыщатIэкIыщт ыкIи япсауныгъэ зыща­псыхьащт кабинетхэр агъэ­псыгъэх, ящыкIэгъэ Iэмэ-псымэхэр ахэм ачIагъэуцуагъэх.

Мыекъопэ къэлэ администрацием гъэсэныгъэмкIэ и Комитет къызэрэщаIуагъэмкIэ, зыщыгыкIэщтхэ, зыщыпщэрыхьащтхэ ыкIи медицинэ IэпыIэгъу зыщарагъэкIыщт блокхэр кIэлэцIыкIу IыгъыпIэм хэ­тых. Щагум къыращыхэмэ, зыщыджэгущтхэ чIыпIэ гъэнэфагъэ куп пэпчъ афа­гъэпсыгъ.

ЗипсауныгъэкIэ ауж къинэрэ кIэлэцIыкIухэм хэушъхьафыкIыгъэ гъэ­сэныгъэ арагъэгъотыным гъэсэныгъэм иучреждение фытырагъэпсыхьагъ.

КIэлэцIыкIу IыгъыпIэм ипащэ игуадзэу Хьаткъо Иринэ къызэриIуагъэмкIэ, купхэм кIэлэцIыкIухэр арагъэтIысхьанхэу рагъэ­жьагъ.

— Сабыйхэм ямыза­къоу кIэлэпIухэмкIи ар на­хьышIоу тэлъытэ. Къин амылъэгъоу чIыпIакIэм есэщтых, нэIуасэ зэфэ­хъущтых, — къыхигъэ-­ щыгъ ащ.

Непэрэ мафэм кIэлэцIыкIу IыгъыпIэм нэбгырэ 80 къекIуалIэ. ЗэкIэмкIи куп 12 къызэIуахынэу щыт, ащ щыщэу 6-р анахь цIыкIухэм ателъытэгъэщт.

ДЕЛЭКЪО Анет. Сурэтхэр Мыекъопэ къэ­лэ администрацием исайт къитхыгъэх.