Лъэпкъ проектэу «Псауныгъ» зыфиIорэм къыдыхэлъы­та­гъэу аужырэ шапхъэхэм адиштэрэ Iэмэ-псымакIэхэр республикэм бэу щызэрагъэгъотыгъэх. Врачхэм ахэр ча­нэу агъэфедэх, зыфэдэ щымыIэ операциехэр ашIын­хэу рагъэжьагъ.

Адыгэ республикэ клиническэ сымэ­джэщым рентгенохирургическэ шIыкIэхэр диагностикэ зыщашIырэ ыкIи зыщя­Iазэхэрэ отделением (эндоваскулярнэ хирургием иотделение) компаниеу «ФИНКО» зыфиIорэр иIэпыIэгъоу мы мафэхэм мастер-класс зэхащагъ. Операцие умышIэу миомэр джырэ лъэхъан зэрэбгъэхъужьын плъэкIыщт шIыкIэр къагъэлъэгъуагъ.

Мастер-классым къыдыхэлъытагъэу Адыгеим хирургическэ IофшIэнибл Адыге­им щызэхащагъ. Шъолъыр проектэу «гу-лъынтфэ узхэм ябэныгъэныр» зыфиIорэм ишIуагъэкIэ къащэфыгъэ ангиографыр агъэфедагъ.

— Аужырэ шапхъэхэм адиштэрэ опе­рациеу республикэм щашIыхэрэм зэхап­шIэу ахэхъощт, ащ ишIуагъэкIэ цIыфхэм япсауныгъэ нахь ухъумагъэ хъущт, — къы­хигъэщыгъ Адыгэ клиническэ сымэ­джэщым ипащэу Чэужъ Нателлэ.

ДЕЛЭКЪО Анет.