Урысые политикэ партиеу «Единэ Россием» пшъэрылъэу къыфишIыгъэр ыгъэцакIэзэ, Къэра­лыгъо Думэм физическэ культурэмкIэ, спортымкIэ, зекIонымкIэ ыкIи ныбжьыкIэхэм яIоф­хэм­кIэ и Комитет хэтэу Хьасанэкъо Мурат «Единэ Россием» и Тхьаматэу Д. А. Мед­веде­вым ишъолъыр общественнэ приемнэ пэIудзыгъэ шIыкIэм тетэу псэупIэ-коммунальнэ хъызмэтым иIофыгъохэмкIэ цIыфхэм щадэгущыIагъ.

Республикэм ис нэбгырэ заулэмэ зыгъэгумэкIырэ IофыгъохэмкIэ — гъогум игъэцэ­кIэжьынкIэ, псэупIэ-коммунальнэ хъызмэтым иучреждение иIофышIэхэм а зы уахътэм вак­цинэр зыхарагъэлъхьанымкIэ IэпыIэгъу къафэхъунэу, ком­мунальнэ фэIо-фашIэхэмкIэ уасэу атырэр тэрэзмэ зэри­гъэ­шIэнэу Къэралыгъо Думэм иде­путат зыкъыфагъэзагъ.

Мыекъуапэ дэс нэбгырэ заулэ ащ къелъэIугъ автомобиль гъогумрэ ащ къыпэIулъ инфраструктурэмрэ ягъэцэкIэжьынкIэ IэпыIэгъу къафэхъунэу. Лъэс гъогу зэрэщымыIэм къыхэкIэу микрорайоным щыпсэухэрэр автомобиль гъогоу къамыгъэнэфырэм ыкIи иутыгъэхэр бэу зиIэм рыкIонхэ фаеу мэхъу.

Урысые политикэ партиеу «Единэ Россием» ифракциеу Урысые Федерацием и Федеральнэ ЗэIукIэ и Къэралыгъо Думэ щыIэм хэтэу Хьасанэкъо Мурат мы Iофыгъом изэшIо­хын­кIэ гъэцэкIэкIо хабзэмрэ чIыпIэ зыгъэIорышIэжьынымрэ якъулы­къу гъэнэфагъэхэм зафигъэ­загъ.

ПсэупIэ-коммунальнэ хъыз­мэ­тым иучреждение ипащэ Къэралыгъо Думэм идепутат къелъэIугъ иIофышIэхэр COVID-19-м щыухъумэгъэнхэм фэшI вакцинэ а зы уахътэм къахалъхьанымкIэ IэпыIэгъу къафэ­хъу­нэу. ЛэжьэкIо коллективым изэIукIэ ащ фэдэ унашъо зэрэщаштагъэр пащэм къыIуагъ.

Мы Iофыгъом изэшIохынкIэ Хьасанэкъо Мурат гъэцэкIэкIо хабзэм икъулыкъу гъэнэфагъэ зыфигъэзагъ.

Республикэм ирайон гупчэхэм ащыщ горэм дэсхэми Къэ­ралыгъо Думэм идепутат зы­къыфагъэзагъ. Фэтэрыбэу зэхэт унэм чIэсхэр къэтхьаусыхагъэх электроэнергиер къаIэкIызыгъа­хьэрэ организацием электро-энергием пае осэшхо атын фаеу ахэм мазэ къэс тхьапэ къазэрафыригъэхьырэмкIэ, ясчетчик­хэм къагъэлъагъорэм ар бэкIэ зэрэшъхьадэкIырэмкIэ.

Мы Iофыгъом изэшIохынкIэ Хьасанэкъо Мурат республикэм икъулыкъухэу уплъэкIунхэр зэхэзыщэхэрэм зафигъэзагъ.

— ЖКХ-м дэгъоу Iоф ышIэ зыхъукIэ ары цIыфхэм социальнэ щынэгъончъагъэ зяIэщтыр. Республикэм исхэм зыкъызэ­рэс­фагъэзэгъэ Iофыгъохэм ары­кIорэм сшъхьэкIэ гъунэ лъысфыщт. Хабзэр аукъуагъэу къызыхэзгъэщыкIэ, хэукъоныгъэхэм ягъэтэрэзыжьын сишъыпкъэу сыпылъыщт, — къыIуагъ Къэралыгъо Думэм идепутат.

Адыгэ Республикэм игъэцэ­кIэкIо хэбзэ къулыкъухэри мы Iофтхьабзэм изэхэщэн къызэ­рэхэлэжьагъэхэр хэзгъэунэфыкIы сшIоигъуагъ.

Къандор Анзор. Урысые Федерацием и Фе­деральнэ ЗэIукIэ и Къэралыгъо Думэ идепутат иIэпыIэгъу.