Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ блэкIыгъэ илъэсым зэшIуихыгъэр зэфихьысыжьыгъ ыкIи 2021-рэ илъэсымкIэ пшъэрылъыкIэхэр зыфишIыжьыгъэх. Ащ фэ­гъэхьыгъэ зэхэсыгъом хэлэжьагъэх АР-м и Премьер-министрэ игуа­дзэу Наталья Широковар, Къэралыгъо Совет — Хасэм и Тхьаматэ игуадзэу Шъэо Аскэр.

Iофтхьабзэр пэублэ гущыIэкIэ Наталья Широковам къызэIуихызэ, къэзэрэугъоигъэхэм шIуфэс къарихыгъ. 2020-рэ илъэсым зэпачыгъэ къиныгъошхом емылъытыгъэу, респуб­ликэм IофшIэнымкIэ ыкIи социальнэ хэхъоныгъэмкIэ и Министерствэ иIофшIэн зэрифэшъуа­шэу зэригъэцэкIагъэр ащ хи­гъэунэфыкIыгъ. Ведомствэм ыпашъхьэ щытыгъэ пшъэрылъхэр гъэхъэгъэшIухэмкIэ зэшIуи­хыгъэх.

— Къыхэзгъэщымэ сшIоигъу, пандемием илъэхъан зыныбжь хэкIотагъэхэр яунэхэм арысынхэ фае зэхъум, ахэм фэIо-фа­шIэу афагъэцакIэхэрэм лъэшэу къазэрэхэхъуагъэр ыкIи социальнэ IофышIэхэм чэщи мафи гъэпсэф ямыIэу а пстэури зэ­рэзэшIуахыщтым ыуж итыгъэх. УФ-м и Президентэу Владимир Путиныр кIэщакIо зыфэхъугъэ Iофтхьабзэу «Мы вместе» зыфи­Iорэм ведомствэм иIофы­шIэхэр чанэу зэрэхэлэжьагъэхэмкIэ, социальнэ тынхэмкIэ Iофыгъоу къэуцущтыгъэхэр псынкIэу дэгъэзыжьыгъэнхэм шъузэрэпы­лъыгъэмкIэ тышъуфэраз, —къы­Iуагъ Наталья Широковам.

ГущыIэр лъигъэкIотагъ Шъэо Аскэр:

— Обществэм илъэныкъо пстэуми коронавирусым иягъэ аригъэкIыгъ. Пчъагъэрэ хэд­гъэунэфыкIыгъ медицинэм иIо­фышIэхэм анахь къиныр апшъэ зэрэдэфагъэр. Ау, шъо шъуиIофышIэхэри апэрэ сатырхэм ахэтыгъэх. Къиныгъохэм ямы­лъытыгъэу ведомствэм иилъэс IофшIэн зэрифэшъуашэу ыгъэцэкIагъ.

Адыгэ Республикэм IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч икIыгъэ илъэсым изэ­фэхьысыжьхэр къышIыгъэх, 2021-рэ илъэсым ведомствэм зыфигъэуцужьырэ пшъэрылъыкIэхэм къатегущыIагъ.

— Пстэуми апэу тыздэла­жьэрэр демографием изытет нахьышIум ылъэныкъокIэ зэхъо­кIыныр ары. ЦIыфхэм нахьыбэ къагъэшIэным, спортым пылъхэм япчъагъэ хэгъэхъогъэным, сабыибэ зэрыс унагъохэм ха­бзэм IэпыIэгъоу къаритырэм епхыгъэ Iофтхьабзэхэр респуб­ликэм зэрэщыдгъэцэкIагъэхэм, нэмыкI лъэныкъохэми язэфэ­хьысыжьхэр непэ къэтшIыщтых, — къыIуагъ ащ.

Мырзэ Джанбэч къызэриIуагъэмкIэ, цIыфхэр социальнэу къэухъумэгъэнхэм епхыгъэу нэ­бгырэ 2215-мэ Iоф ашIэ. 2020-рэ илъэсым къыкIоцI социальнэ Iофыгъохэм япхыгъэ шэпхъэ-правовой акт 220-м ехъу аштагъ. Къэралыгъо программэу «ЦIыфхэм социальнэ Iэпы­Iэгъу ягъэгъотыгъэныр» зыфи­Iорэр ведомствэм пхырещы ыкIи икIыгъэ илъэсым сомэ миллион 4164,9-рэу къыфатIупщыгъэм щыщэу сомэ миллион 4124,8-р ыгъэфедагъ. Социальнэ IэпыIэгъу нэбгырэ 153881-мэ арагъэгъотыгъ.

2020-рэ илъэсым респуб­ликэм кIэлэцIыкIу 4418-рэ къы­щыхъугъ, ар 2019-рэ илъэсым ебгъапшэмэ, нэбгырэ 217-кIэ нахьыб. Ащ щыщэу унэгъо 1336-мэ зэтыгъо ахъщэ тынэу сомэ мин 50 зырыз аратыгъ (ящэнэрэ е ащ къыкIэлъыкIорэ сабый къызфэхъугъэхэр).

Зыныбжь хэкIотагъэхэр джырэ щыIакIэм хэгъэгъозэгъэнхэм ыкIи ящыIэныгъэ нахьышIу хъу­ным фэIорышIэрэ проектэу «Нахьыжъхэр» зыфиIорэр рес­публикэм щыпхыращы. Ащ игъэ­цэкIэн сомэ миллиони 7,6-м ехъу пэIуагъэхьагъ.

Нэжъ-Iужъхэм я Мафэ ехъу­лIэу илъэси 100 зыныбжь е ащ ехъугъэ нэбгырэ 26-мэ Адыгэ Республикэм и ЛIышъхьэ ыцIэкIэ шIухьафтынхэр аратыгъэх.

Нэжъ-Iужъхэм япсауныгъэ изытет лъыплъэнхэр, ахэм ящы­кIэгъэ IэпыIэгъур арагъэгъотыныр министерствэм мэхьанэшхо зэритырэ Iофыгъохэм ащыщ. БлэкIыгъэ илъэсым рес­публикэм ит унэ-интернатхэм ащыпсэухэрэм сомэ мин 853-рэ зыосэ прививкэхэр афашIыгъэх.

АР-м и ЛIышъхьэ иунашъо ди­штэу 2020-рэ илъэсым гъу­напкъэу агъэнэфагъэхэм апкъ къи­кIыкIэ чIыпIэ къин ифэгъэ унагъохэу кIэлэцIыкIухэр зэ­рысхэм зэтыгъо ахъщэ IэпыIэгъу афатIупщыгъ. Ащ къыхиубытагъ зигъот мэкIэ унэгъо 10896-рэ, ахэм сомэ миллион 39,5-рэ атырагощагъ.

Министрэу Мырзэ Джанбэч игъэкIотыгъэу къызтегущыIа­гъэхэм ащыщ къэралыгъо программэу «Iэрыфэгъу щыIакI» зыфиIорэр. Ащ къэралыгъом ипащэхэм мэхьанэшхо раты. Адыгеим сэкъатныгъэ зиIэ нэбгырэ мин 35-рэ щэпсэу. ИкIыгъэ илъэсым программэм ипхырыщын сомэ миллиони 8-рэ мин 222-рэ пэIуагъэхьагъ. Ащ ишIуа­гъэкIэ сэкъатныгъэ зиIэхэм яфэIо-фашIэхэр социальнэ лъэ­ныкъом иобъекти 6-мэ аща­фагъэцэкIэнхэ амал щыIэ хъугъэ, псэолъи 133-мэ екIолIапIэхэр афашIыгъэх.

Министрэр зылъыIэсыгъэхэм ащыщ МФЦ-хэм яIофшIэн. Пандемием илъэхъан мы къулы­къум иIофшIэн гъунэпкъэ гъэнэфа­гъэхэм атетыгъ ыкIи ащ къы­хэкIыкIэ цIыфэу зыфэзгъэза­гъэхэм япчъагъэ 2019-рэ илъэ­сым ебгъапшэмэ нахь мэкIагъ — нэбгырэ 402757-рэ, ахэм фэIо-фэшIэ 530368-рэ афагъэцэкIагъ.

КIэухым IофшIэным изэхэщэнкIэ IэпыIэгъу къафэхъугъэ къулыкъухэм зэрафэразэхэр министрэм къыхигъэщыгъ. Джащ фэдэу, илъэсэу икIыгъэм чанэу зыкъэзгъэлъэгъогъэ социальнэ IофышIэхэм афэгушIуагъэх.

Iэшъынэ Сусан.

Сурэтхэр Iэшъынэ Аслъан тырихыгъэх.