Хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ иколлегие игъэкIотыгъэ зэхэсыгъоу иIагъэм 2020-рэ илъэсым Iофэу ышIагъэм изэфэхьысыжьхэм ыкIи тызыхэт илъэсым пшъэрылъэу зыфигъэуцужьыхэрэм щытегущыIагъэх. Iофтхьабзэм хэлэжьагъ хьыкум приставхэм я Федеральнэ къулыкъу ипащэ игуадзэу Владимир Ворониныр.

ГъэIорышIапIэм ипащэу, республикэм ихьыкум пристав шъхьаIэу Александр Ихно илъэсым изэфэхьысыжьхэм ыкIи гухэлъэу щыIэхэм къатегущыIагъ. Ащ къызэриIуагъэмкIэ, федеральнэ ведомствэм къыгъэнэфэгъэ пшъэрылъхэм ягъэцэкIэнкIэ, шIуагъэ къытэу IофшIэныр зэхэщэгъэнымкIэ ГъэIорышIапIэм къэгъэлъэгъонышIухэр иIэх. 2020-рэ илъэсым сомэ миллиарди 4 зытефэрэ Iоф мини 150-м ехъу хьыкум приставхэм зэхафыгъ.

Административнэ хэбзэукъоныгъэ 400-м шIокIэу къыхагъэщыгъ, ыпэрэ илъэсым егъэпшагъэмэ, а пчъагъэр процент 44-кIэ нахьыб. БэшIагъэу зылъы­хъущтыгъэхэ нэбгырэ 35-рэ къаубытыгъэх.

КъулыкъушIэхэм анахьэу анаIэ зытырагъэтыгъэр социальнэ мэхьанэ зиIэ Iофыгъо­хэм язэшIохын ары. Зэхэубы­тэгъэ бюджетым сомэ миллион 700-м ехъу рагъэхьа­жьыгъ. КIэлэпIупкIэм итынкIэ зыныбжь имы­къугъэхэм яфитыныгъэхэр къаухъумэзэ сомэ миллион 54-рэ афызэкIагъэкIожьыгъ. КIэлэпIупкIэр зымытырэ ыкIи чIыфэшхо зэIузыгъэкIэгъэ нэбгырэ 440-мэ административнэ пшъэ­дэ­кIыжь арагъэхьыгъ, уголовнэ Iофи 145-рэ къызэIуахыгъ.

Къолъхьэ тын-Iыхыным пэшIуекIогъэныр, хэбзэгъэуцугъэм диштэу пшъэрылъхэр гъэцэкIэгъэнхэр Iофыгъо шъхьаIэхэм ащыщэу ГъэIорышIапIэм ипащэ къыгъэ­нэфагъ. Джащ фэдэу хэбзэIахьхэр, административнэ тазырхэр, нэмыкIхэри игъом зымытыхэрэм алъэныкъокIэ Iофэу ашIагъэм къытегущыIагъ. 2021-рэ илъэ­сым анахьэу анаIэ зытырагъэтыщтхэр къыгъэнэфагъэх.

Зэхэсыгъом икIэух илъэсым изэфэхьысыжьхэм къадыхэлъытагъэу зипшъэрылъхэр анахь дэгъоу зыгъэцэкIэгъэ структурнэ подразделениехэр ведомственнэ тынхэмкIэ къыхагъэщыгъэх, ахэм афэгушIуагъэх.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.