«Россети Кубань» и Адыгэ шъолъыр къутамэ 2021-рэ илъэсым Краснодар краим ыкIи Адыгэ Республикэм ямуниципальнэ образовании 8-мэ электроэнергиер язытырэ псэолъэ 47-рэ ащызэблихъунэу ыгъэнэфагъ.

Ахэм киловатт 35 — 110-рэ къаты, социальнэ ыкIи промышленнэ псэолъэ зэфэшъхьафыбэ япхыгъ. Специалистхэм трансформаторхэр, кIуапIэхэр, нэмыкI оборудованиехэр зэблахъущтых, агъэцэкIэжьыщтых, машIом щыухъумэгъэнхэу ашIыщт.

Киловатт 35-рэ къэзытырэ подстанциеу «Кужорская» зыфиIорэр ыкIи Мые­къопэ районым электричествэр езытырэ кIуапIэу ащ епхыгъэхэр икIэрыкIэу ашIыжьынхэу охътэ благъэм рагъэжьэщт. Ахэр загъэкIэжьыхэрэм ыуж мега-вольт 20-м нэсэу кIуачIэ иIэ хъущт.

Мы подстанцием социальнэ псэуалъэхэр епхыгъэх ыкIи станицэу Кужорскэм щыпсэурэ нэбгырэ миниплI фэдизмэ электричествэр аIэкIегъахьэ. Ащ имыза­къоу Адыгеим иэкономикэкIэ мэхьэнэ ин зиIэ мэкъумэщ хъызмэтшIапIэу, пчэныщэм хэшIыкIыгъэ гъомылапхъэхэр къыдэзыгъэкIырэ комплексэу «Мирный-Адыгея» зыфиIорэри епхыгъ.

Мы уахътэм энергетикхэм проектхэм Iоф адашIэ. Нэужым жъы хъугъэ трансформаторитIум ачIыпIэкIэ зэпстэумкIи мега-вольт 20 кIуачIэу яIэу тIу агъэуцущт, нэмыкI оборудованиеу подстанцием Iоф езгъашIэхэрэр зэблахъущтых. Джащ фэдэу электричествэм икIуапIэу километрэ 11 икIэрыкIэу ашIыжьыщт.

— Илъэсищ благъэм Мыекъуапэ иподстанциехэу «Северная», «Черемушки» зыфиIохэрэр, Мыекъопэ районым электроэнергиер IэкIэзгъахьэхэу «Кужорскэр», «Тульскэр» ыкIи «Садовар», Джэджэ районым иподстанциеу «Комбизавод» зыфиIорэр икIэрыкIэу тшIыжьынхэу гухэлъ тиI. Мы псэуалъэхэр гъэкIэжьыгъэ зыхъукIэ кIуачIэхэм ахэхъощт, шъолъыр инвестиционнэ проект зэфэшъхьафхэм япхырыщынкIэ яшIуагъэ къэкIощт, — къыIуагъ компанием и Адыгэ шъолъыр къутамэ ипащэу Рустам Магдеевым.