Мыекъопэ къэзэкъ отделым и Совет игъэкIотыгъэ зэхэсыгъоу иIагъэм уахътэм диштэрэ Iофыгъохэм ягъэцэкIэн щытегущыIагъэх.

2021-рэ илъэсым мэзаем IофшIагъэу яIэр зэфахьысыжьыгъ, къэ­кIощт уахътэм телъытэгъэ мурадхэр рахъухьагъэх.

Отделым ипащэу Александр Даниловым игущыIэ щыхигъэунэфыкIыгъ пэсэрэ лъэхъаным адыгэхэм ИлъэсыкIэр зэрагъэмэфэкIыщтыгъэр. Гъэтхэпэ мазэм республикэм мэфэкIыр гъэшIэгъонэу щызэхащэным къэзэкъхэр хэлэжьэщтых. ИлъэсыкIэм ехьылIэгъэ Iофтхьабзэхэр рахъухьагъэх.

Къырым Урысыем къызэрэхэхьажьыгъэм, Масленицэм, бзылъфыгъэхэм я Дунэе мафэ, нэмыкIхэм афэгъэхьыгъэ зэIукIэгъухэм отделым зафегъэхьазыры.

ТекIоныгъэм и Парад Москва зэрэщыкIощтым, ащ къэзэкъхэр зэрэхэлэжьэщтхэм хэушъхьафыкIыгъэу Мыекъопэ къэзэкъ отделым Iоф дишIэщт.

Къэбар жъугъэм иамалхэмрэ къэзэкъ отделымрэ язэпхыныгъэхэр нахьышIоу зэхэщэгъэнхэм, Мыекъопэ къэзэкъ культурэм ия 30-рэ фестиваль жъоныгъокIэ мазэм и 28 – 31-м Мыекъопэ районым зэрэщыкIощтым, къэзэкъ обществэхэм яуставхэм зэхъокIыныгъэхэр афэшIыгъэнхэм, нэмыкIхэм атегущыIагъэх.

Александр Даниловыр отделым иветеранхэм, общественнэ Iофхэр чанэу зыгъэцакIэхэрэм афэгушIуагъ, шIухьафтынхэр аритыжьыгъэх.

Екатерина Загорулько.

Мыекъопэ къэзэкъ отделым ипащэ игуадз.