Унагъоу 2012-рэ илъэсым итыгъэгъэзэ мазэ ыуж, 2021-рэ илъэсым игъэтхапэ и 31-м шIомыкIэу, кIэлэцIыкIу къызэрыхъухьагъэхэм зэтыгъо ахъщэ тынэу сомэ 5000 къафэкIонэу къатефэ. Адыгеим щыпсэоу ар къызэратыгъэр мы уахътэм нэбгырэ 43597-рэ мэхъу. ПстэумкIи ащ пэIухьанэу сомэ миллион 218-рэ агъэнэфагъ.

Шъугу къэтэгъэкIыжьы, УФ-м и Президент 2020-рэ илъэсым тыгъэгъазэм и 17-м сабый зэрыс унагъохэм зэтыгъо ахъщэ тын афэгъэкIогъэным фэгъэ­хьыгъэ унашъом кIэтхагъ. Ащ къызэрэщыдэлъытагъэмкIэ, кIэ­лэцIыкIоу зыныбжь илъэси 7-м шIомыкIыгъэм янэ, ятэ е ыпIунэу зыштагъэр УФ-м игражданинэу ыкIи ащ щэпсэумэ ахъщэр ыгъэпсынэу фитыныгъэ иIэ мэхъу.

Унагъоу илъэси 3-м зыныбжь нэмысыгъэ сабый зэрысхэм мазэ къэс къафэкIорэ ахъщэ тыныр е илъэси 3 — 16 зыныбжьхэм зэтыгъоу къараты­гъэр 2020-рэ илъэсым къызфэкIуагъэхэм лъэIу тхылъ атын имыщыкIагъэу ПенсиехэмкIэ фондым афигъэпсыгъ. Ау кIэлэцIыкIур 2020-рэ илъэсым бэдзэогъум и 1-м ыуж къэхъугъэмэ, ахэм къахиубытагъэп. Джащ фэдэу унашъор къыздэкIыгъэм ыуж, тыгъэгъазэм и 18-м къыщегъэжьагъэу пштэмэ, кIэлэцIыкIу къызфэхъугъэхэми ар агъэпсынэу фитыныгъэ яIэ мэхъу.

Арышъ, янэ, ятэ е ыпIунэу зыштагъэм лъэIу тхылъыр къытын фае. 2021-рэ илъэсэу тызыхэхьагъэм гъэтхапэм и 31-м шIомыкIэу ар гъэцэкIэгъэн фаеу щыт, къэралыгъо фэIо-фашIэхэм япортал щыптымэ хъущт, ПенсиехэмкIэ фондым уекIуалIэми пIахыщт.

Ным е тым банкым счетэу щыриIэр зэблэхъугъэ хъугъэмэ е зэфашIыжьыгъэмэ, ари ыгъэ­нэфэн фае.

Зэтыгъо ахъщэ тыныр бгъэ­псыным ным, тым е кIэлэцIыкIур ыпIунэу зыштагъэм ипаспорт, СНИЛС-р, кIэлэцIыкIур къызэрэхъугъэр къэзыушыхьатырэ тхылъыр (свидетельство о рож­дении), ащ и СНИЛС, банкым счетэу щыгъэпсыгъэр ары ищыкIагъэхэр.

ШъунаIэ тешъудз! 2021-рэ илъэсым гъэтхэпэм и 31-м нэс лъэIу тхылъыр зыптын плъэкIыщтыр.