Хэгъэгум атлетикэ онтэгъумкIэ ихэшыпыкIыгъэ ныбжьыкIэ командэ хэтхэу Адыгеим ибатырхэм зэнэкъокъухэм зафагъэхьазыры. — Москва хэкум икъалэу Чехов щыкIорэ уплъэкIун-егъэджэн зэIукIэгъухэм ахэлажьэх Дмитрий Шмариныр, Давид Саядян, ПчыхьакIэ Амир, — къытиIуагъ Адыгэ Республикэм атлетикэ онтэгъумкIэ икIэлэцIыкIу-ныбжьыкIэ спорт еджапIэу Чыржьын Мухьарбый ыцIэ зыхьырэм ипащэу Сихъу Рэмэзан. — ТиныбжьыкIэхэм пэщэныгъэ адызэрехьэ тренерэу, спортымкIэ дунэе класс зиIэ мастерэу Сихъу Аслъан.

Гъэтхэпэ мазэм Урысыем иныбжьыкIэхэм язэнэкъокъоу Старый Оскол атлетикэ онтэгъум­кIэ щыкIощтым тибатырхэм зыфагъэхьазыры. Таганрог щы­Iэхэу яIэпэIэсэныгъэ хагъахъо Александр Денделевич, Бгъуашэ Асхьад, Гъубжьэкъо Ислъам, Дзэсэжъ Аслъан, Артем Горловым, Елизавета Толмачевам, ЩашIэ Рустам, ШхончбэшIэ Селым, Михаил Федотовым.

Тренерхэу Чэмбэхъу Анзор ыкIи Гъубжьэкъо Арсен ныбжьыкIэхэм япащэхэу уплъэкIун зэхахьэхэр зэхащэх.