ТагъэгушIо ашIоигъу
Мыекъопэ баскетбол командэу «Динамо-МГТУ-р» Урысыем изэнэкъокъоу суперлигэм ия 2-рэ куп щыкIорэм хэлажьэ, апэ итхэм ащыщ.
Баскетбол клубхэм пэшIорыгъэшъ ешIэгъухэр аухыгъэх. «Динамо-МГТУ-м» ятфэнэрэ чIыпIэр къыдихи, медальхэм афэбэнэнэу фитыныгъэ иIэ хъугъэ.
Апэрэ чIыпIитфыр къыдэзыхыгъэ клубхэр зы купым хэтхэу Тамбов щызэдешIэщтых. Я 6 — 11-рэ чIыпIэхэр зыхьыгъэхэр хэушъхьафыкIыгъэу зэIукIэщтых. Апэ ишъыгъэ командищыр апэрэ чIыпIи 5-р зыхьыгъэ командэхэм якуп хэхьажьынхэшъ, зэнэкъокъум паублэжьыщт.
Гъэтхапэм и 11 – 15-м Тамбов щызэIукIэщтхэр: «Тамбов», «Барнаул», «Металлург», «Чебоксарские Ястребы», «Динамо-МГТУ». Къыдахырэ чIыпIэхэм ялъытыгъэу финалым и 1/4, нэмыкIхэм ащешIэщтых.
— Зэнэкъокъур къызэрыкIоп, — къытиIуагъ «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Андрей Синельниковым. – «Барнаул», «Тамбов», фэшъхьафхэм опыт зиIэ ешIакIохэр къырагъэблэгъагъэх, медальхэм афэбэнэщтых. Адыгеим икоманди кIэух зэIукIэгъухэм зафегъэхьазыры. Тикомандэ къыфэгумэкIыхэрэр дгъэгушIонхэ тимурад.
«Динамо-МГТУ-м» икапитанэу Илья Александровым, Артем Гапошиным, Николай Ереминым, Максим Князевым, Владимир Чичайкиным, Александр Милютиным, Юрий Кочневым, нэмыкIхэм тагъэгушIо ашIоигъу.