УФ-м и Президентэу Владимир Путиныр кIэщакIо зыфэхъугъэ лъэпкъ проект 12-м щыщэу «ПсэупIэр ыкIи къэлэ щыIакIэр» зыфиIорэр пхы­рыщыгъэным фэшI аштэгъэ проектэу «Непэрэ шапхъэхэм адиштэ­рэ къэлэ щыIакIэр гъэпсыгъэныр» зыфиIорэм къыдыхэлъытагъэу зэты­ра­гъэпсыхьащт общественнэ чIыпIэхэр къыхэхыгъэнхэм пае мэкъэ­тынэу Адыгеим щызэхащэщтым муниципалитетхэм зыфагъэхьазыры.

УФ-м псэолъэшIынымкIэ и Министерствэрэ интернет зэпхыныгъэхэм апылъ мыком­мерческэ организациеу «Диалог Регионы» зыфиIорэмрэ Урысыем ишъолъырхэм мыщ фэдэ мэкъэтынхэр зыщызэхащэщт платформэр агъэхьазы-ры. Iофтхьабзэр цIыфхэмкIэ нахь къызэрыкIоу, къызIэкIэ­гъэхьэгъошIоу афэхъуным ар фэIорышIэщт.

Шъолъыр ыкIи къалэ пэпчъ гъэкIэжьыгъэн фэе общественнэ чIыпIэу иIэр интернет нэ­кIубгъом щыгъэнэфэгъэщт. Къэралыгъо фэIо-фашIэхэм япортал бгъэфедэзэ ащ зы­щыптхымэ, псэуалъэу зэтырагъэпсыхьажьыщтыри, ар зэрэшIыгъэщтым ипроекти ибгъотэщтых. Мэкъэтынхэр мэлылъ­фэгъум и 26-м щегъэжьагъэу жъоныгъуакIэм и 30-м нэс зэкIэ шъолъырхэм ащыкIощт.

Ащ пай къэмынэу, Адыгеим щыпсэухэрэм нахьыпэкIэ амакъэ зэратыщтыгъэ шIыкIэхэри къэнэжьыщтых. ГущыIэм пае, поселкэу Инэм дэсхэм пэIу­дзыгъэу атын амал зэряIэщтым имызакъоу, очнэуи ар агъэцэкIэн алъэкIыщт. Ащ пае жъо­ныгъуакIэм и 29-м участкэхэр къызэIуахыщтых.

Тэхъутэмыкъое район администрацием ипресс-къулыкъу къызэрэщаIуагъэмкIэ, поселкэм дэсхэр ахэм якIолIэнхэшъ, яшIошI къыраIотыкIын алъэ­кIыщт. Адыгэ Республикэм ыныбжь илъэс 15 зэхъум къызэIуахыгъэгъэ площадыр ары мыгъэ Инэм щагъэцэкIэжьыщтыр. Ар зэрэгъэпсыгъэщтыр къыщыгъэлъэгъуагъэу проек- титIу къагъэхьазырыгъ.

Поселкэм иадминистрацие зычIэт унэм (урамэу Чкаловым ыцIэ зыхьырэр, 13) ыкIи культурэм, спортым зыщапылъхэ гъэпсэфыпIэ гупчэу дэтым (ура­мэу Сединэм ыцIэ зыхьырэр, 42-рэ) участкэхэр ащагъэпсыщтых. Илъэс 14-м зыныбжь ехъугъэхэм зэкIэми амакъэ атын алъэкIыщт, проектитIум язырэр ары къыхахын фаер.