«Урысые кIэлэцIыкIу фондым» и Адыгэ рес­публикэ къутамэ илъэс пчъагъэ хъугъэу ча­нэу Iоф ешIэ. БлэкIыгъэ илъэсым изэфэхьысыжьхэр зэдгъашIэ тшIоигъоу фон­дым ипащэу Татьяна Го­голевам мы мафэхэм гу­щыIэгъу ты­фэхъугъ.

— «ШIу умышIэу зы мафи ущымыс» — джары девизэу тэ зыфэдгъэуцужьыгъэр, — еIо Татьяна Гоголевам. — ЩыIэныгъэм чIыпIэ къин ригъэуцогъэ кIэлэцIыкIухэм, сэкъатныгъэ зиIэ сабыйхэр зыщапIурэ унагъохэм психо­логическэ, юридическэ ыкIи ахъщэ IэпыIэгъу ядгъэгъотыныр ары пшъэрылъ шъхьаIэу тиIэр. Джащ фэдэу зыныбжь имыкъугъэхэм аIэ зытырамыщэежьыным, замыукIыжьыным фэгъэхьыгъэ Iофтхьабзэхэр ренэу зэхэтэщэх.

Шъыпкъэу пIощтмэ, 2020-рэ илъэсым коронавирусым зыкъы­зэриштагъэм ыпкъ къикIыкIэ итхъухьэгъэ Iофтхьэбзэ пчъагъэ зэпыугъэ хъугъэ, ау ащ дакIоуи нэмыкI пшъэрылъхэри тиIэ хъу­гъэх. Пандемием къыхэкIыкIэ шэпхъэ гъэнэфагъэхэр щыIа­гъэх, цIыфхэр унэм къикIынхэ амал яIагъэп, ащ къыхэкIыкIэ къа­лэ­жьырэр нахь макIэ хъугъагъэ, психологическэ IэпыIэгъу зищыкIагъэхэм ахэхъогъагъ, кIэлэцIыкIухэр пэIудзыгъэ шIыкIэм тетэу еджагъэх. БлэкIыгъэ илъэсхэм IэпыIэгъу зищыкIэгъэ унагъохэм адэжь тыкIощтыгъэ­мэ, кIэлэцIыкIухэм, ны-тыхэм за­IудгъакIэщтыгъэмэ, гущыIэгъу тафэхъущтыгъэмэ, гъэтхапэм къыщегъэжьагъэу онлайн шIыкIэм тетэу Iоф адэтшIагъ. Ана­хьэу психологическэ IэпыIэгъу, яфитыныгъэхэр къэухъумэгъэнымкIэ ашIэн фаехэр агурытэгъаIох, амалэу щыIэмкIэ ти­шIуагъэ ятэгъэкIы. Гъомылап­хъэхэр дезинфекцие зэрашIыщт­хэр къызэращэфыщт ахъщэ Iэ­пыIэгъури ядгъэгъотыгъ.

Пандемием ыпкъ къикIыкIэ Хэгъэгу зэошхор заухыгъэр илъэс 70-рэ зэрэхъурэм фэгъэ­хьыгъэ Iофтхьабзэхэм, кIэлэцIыкIухэм якъэухъумэн и Дунэе мафэ ыкIи нэмыкIхэм язэхэщэн зэпыугъ.

Урысые кIэлэцIыкIу фондымрэ Къэралыгъо кIэлэцIыкIу тхылъеджапIэмрэ 2019-рэ илъэ­сым шэкIогъу мазэм Урысые зэнэкъокъоу «Читаем Альберта Лиханова: книги о вере, любви, надежде» зыфиIорэр зэхащэ­гъагъ. А. А. Лихановым итхылъхэм анаIэ тырадзэныр, итхы­гъэхэм яджэнхэр, зэрагъэшIэнхэр ары пшъэрылъ шъхьаIэу зэхэщакIохэм яIагъэр. ПIуныгъэ тэрэз яIэным, хэгъэгур шIу алъэгъуным, ащ фэшъыпкъэнхэм А. А. Лихановым кIэлэцIыкIухэр фепIух. Зыныбжь имыкъугъэхэм фитыныгъэу яIэхэр къыреIотыкIых. Зэнэкъокъум хэлэжьагъэхэм джащ фэдэу Урысыем итарихъ нахь игъэкIотыгъэу зэрагъэшIэн амал яIагъ. Адыгэ Республикэм и Премь­ер-министрэ игуадзэу Наталья Широковар, АР-м культурэмкIэ и Министерствэ ыкIи республикэ кIэлэцIыкIу ыкIи муниципальнэ тхылъеджапIэхэм ялIыкIохэр яIэпыIэгъухэу шъолъырым щыщ кIэлэцIыкIухэр Урысые зэнэ­къокъум хэлэжьагъэх. А. А. Лихановым итхыгъэхэм кIэлэеджакIохэр къеджагъэх, сочинение, эссе атхыгъ, ежьхэми усэхэр зэхагъэуцуагъэх. Анахь IофшIэн дэгъоу къыхахыгъэхэр Москва рагъэхьыгъэх.

Мыекъопэ районымкIэ кIэлэцIыкIуитIумэ, Кощхьэблэ районымкIэ кIэлэеджэкIуитIумэ ыкIи Теуцожь районымкIэ нэбгы­рий­мэ яIофшIэн анахь дэгъоу алъы­тагъэх, ахэм дипломхэр къафа­гъэшъошагъэх. Мы Iофтхьабзэм изэхэщэн республикэ кIэлэцIыкIу тхылъеджапIэр чанэу зэ­рэ­хэлэжьагъэм пае рэзэныгъэ тхылъ къыратынэу агъэнафэ.

— Джащ фэдэу «Изучи иностранный язык» зыфиIорэ шъо­лъыр программэм изэхэщэн онлайн шIыкIэм тетэу лъыпыддзэжьыгъ. Ащ ишIуагъэкIэ унэгъо Iужъухэм, гъот макIэ зиIэхэм къарыкIыгъэхэм, сэкъатныгъэ зиIэхэм, зятэ-зянэ зимы­­Iэжь кIэлэцIыкIухэм IэкIыб къэ­ра­лы­гъуабзэхэр зэрагъашIэх. Гъэсэныгъэм игупчэу «Планета» зы­фиIорэм ипащэу К. Н. Павловым ащкIэ лъэшэу тыфэраз, — еIо Татьяна Гоголевам.

ЗипсауныгъэкIэ ауж къинэрэ сабыйхэм апае илъэсыкIэм ехъулIэу фондым шIухьафтынхэр ыгъэхьазырхи, медицинэ колледжым истудентхэм аратыгъэх.

Урысые Федерацием и Президент иунашъокIэ 2020-рэ илъэсым чъэпыогъу мазэм об­щественнэ-къэралыгъо организациеу «Фонд защиты детей» зыфиIорэм изэхэсыгъо Москва щыкIуагъ. Мы организацием «Урысые кIэлэцIыкIу фондым» и Адыгэ рес­публикэ къутамэ хэхьагъ. ПIуны­гъэ тэрэз кIэлэцIыкIухэм ахэлъхьэгъэным нахь мэхьанэ ра­тын зэрэфаемкIэ УФ-м и Къэралыгъо Думэ идепутатхэм зафагъэзагъ. «Урысые кIэ­лэцIыкIу фондым» и Адыгэ республикэ къу­тамэ ипащэ къы­зэриIуагъэмкIэ, къихьэгъэ илъэсым пшъэрылъ гъэнэфагъэ­хэр зыфагъэуцужьыгъэх, ахэр щыIэныгъэм зэрэщыпхыращыщтхэм, яIофшIэн зэрэхагъэхъощтым, шIушIэ Iоф­тхьабзэхэр нахьыбэу зэрэзэхащэщтхэм анаIэ тырагъэтыщт.

ДЕЛЭКЪО Анет.