Нахь псынкIэу ыкIи пыутэу газыр алъагъэIэсыщт
«2030-рэ илъэсым ехъулIэу хэгъэгум ипсэупIэ пстэуми газыр алъыгъэIэсыгъэнэу Урысыем и Президентэу Владимир Путиным къафишIыгъэ пшъэрылъыр гъэцэкIэгъэным пае апэрэ чэзыоу газификациемкIэ шъолъыр оператор зыкI къэгъотыгъэн фае», — къыщиIуагъ «Единэ Россием» и Тхьаматэу Дмитрий Медведевым Урысые Федерацием и Правительствэрэ «Газпромымрэ» ялIыкIохэм адыриIэгъэ зэдэгущыIэгъум.
ЦIыфхэм нахь пыутэу газыр зэрафыращэщтым имызакъоу, ягъунапкъэ рыкIорэ газрыкIуапIэм яунэ пызышIэщтыр зэрафызэхэмыфыщтыгъэри дэгъэзыжьыгъэ хъущт. Ащ нэмыкIэу тхьапэхэм ягъэхьазырынкIи операторыр IэпыIэгъу къафэхъущт.
«ГазрыкIуапIэм пашIэнхэм, гъэстыныпхъэ шхъуантIэр къаIэкIагъэхьаным, техническэ фэIо-фашIэхэр къафагъэцэкIэнхэм апае зэзэгъыныгъэ зэдашIын, ащкIэ МФЦ-мрэ къэралыгъо фэIо-фашIэхэмкIэ порталымрэ къызфагъэфедэн алъэкIыщтыгъэ. ЦIыфхэмкIэ нахь Iэрыфэгъу хъуным пае къэлэгъэпсыным, чIыгу зэфыщытыкIэхэм, мэзхэм япхыгъэ хэбзэгъэуцугъэхэм зэхъокIыныгъэ горэхэр афэшIыгъэнхэ фаеу хъущт», — къы-Iуагъ «Единэ Россием» и Тхьаматэ.
«Гъогу картэм» ипроектэу Минэнергэмрэ партиемрэ зэдагъэхьазырыгъэм ащ фэдэ зэхъокIыныгъэхэр къыщыдэлъытагъэх.
Оператор зыкIым икъыхэхын шъолъырхэм къащыдырагъэштагъ. Минэнергэми «Газпромыми» ащ фэдэ гукъэкIыр игъоу алъэгъугъ. Компанием итхьаматэу Алексей Миллер къызэриIуагъэмкIэ, шъолъыр оператор зыкI щыIэ зыхъукIэ, процент 30-кIэ нахь пыутэу унэхэр газрыкIуапIэм пашIэнхэ алъэкIыщт.
Дмитрий Медведевым зэрэхигъэунэфыкIыгъэмкIэ, Правительствэмрэ «Газпромымрэ» игъусэхэу «Единэ Россием» предложениехэр зэкIэ зэфихьысыжьыщтых, ыужкIэ Къэралыгъо Советым изэхэсыгъо ахэм щахэплъэнхэ алъэкIыщт.
«Газ отраслэм изегъэушъомбгъун Адыгеим мэхьанэшхо щыраты, — къыIуагъ республикэм и Къэралыгъо Совет — Хасэм и Тхьаматэ игуадзэу, партием и Тхьаматэу Д. А. Медведевым ишъолъыр общественнэ приемнэ ипащэу, федеральнэ партийнэ проектэу «Урысые къуаджэхэр» зыфиIорэм икоординаторэу Шъао Аскэр. — Газыр псэупIэхэм ящэлIэгъэнымкIэ Урысыем пэрытныгъэр щызыIыгъхэм Адыгеир ащыщ. Адыгэ Республикэм газыр къыIэкIэхьанымкIэ ыкIи ипсэупIэхэм ар ящэлIэгъэнымкIэ программэу 2021 — 2025-рэ илъэсхэм ателъытагъэм гъэрекIо ичъэпыогъу мазэ КъумпIыл Муратрэ Алексей Миллеррэ зэдыкIэтхагъэх. А программэм тетэу сомэ миллиарди 3-м ехъу республикэм къыIэкIэхьащт, 2025-рэ илъэсым нэс псэупIэхэм япроцент 95,97-мэ газрыкIуапIэхэр афыращэщтых».
Шъугу къэтэгъэкIыжьы 2020-рэ илъэсым ишышъхьэIу мазэ газрыкIуапIэхэр шъолъырхэм зэращагъэпсыщтхэм епхыгъэ Iофыгъом зэрэтегущыIэгъагъэхэр. Партиеу «Единэ Россием» джащыгъум игъо ылъэгъугъагъ цIыфхэм яунэхэр пкIэ хэмылъэу газрыкIуапIэхэм апашIэнхэу, ащ пэIухьащтыр «Газпромым» ежь къыгъотынэу. Джащ фэдэу зызекIохэкIэ, 2024-рэ илъэсым икIэух ехъулIэу псэупIэхэм япроцент 90-м ехъумэ газыр алъыIэсыщт.