Гъэтхапэм и 1-м къыщегъэжьагъэу гурыт еджапIэхэм Урысые уплъэ­кIун IофшIэнхэр (ВПР) щарагъэжьагъэх. Зы шапхъэм тетэу зэрэ­хэ­гъэгоу щеджэрэ кIэлэеджакIохэм ар атхыщт.

ЫпэкIэ зэрэщытыгъэм фэдэу мы илъэсыми я 4 — 8-рэ классхэм арыс кIэлэеджакIохэм ар атхыщт, ау я 11-рэ классхэмкIэ гурыт еджапIэхэм ежь зэрэрахъухьагъэм тетэу Iофтхьабзэр кIощт. Рособрнадзорым къызэриIуагъэмкIэ, ВПР-р кIэлэеджэкIо миллиони 7-м ехъумэ мыгъэ атхыщт.

— Гъэтхапэм и 1-м къыщегъэжьагъэу и 26-м нэс я 11-рэ классхэм уплъэкIун Iоф­шIэнымкIэ заушэтыщт, нэмыкI классхэм гъэтхапэм и 15-м къыщегъэжьагъэу и 21-м нэс яшIэныгъэхэр къагъэлъэгъощтых. Класс пэпчъ IофшIэныр зыщатхыщт мафэр еджапIэхэм ежь-ежьырэу агъэнэфэщт, — къыщаIуагъ Рособрнадзорым.

Апэу IофшIэнхэр зыгъэцэкIэщтхэр я 11-рэ классхэм арыс кIэлэеджакIохэр арых. Тари­хъым­кIэ, географиемкIэ, био­ло­гиемкIэ, химиемкIэ, физикэмкIэ ыкIи IэкIыб къэралыгъуа­бзэ­хэм­кIэ ахэм заушэтыщт. Мы предметхэмкIэ зэтыгъо къэ­ралыгъо ушэтынхэр зы­мытыщтхэр арых ВПР-р зы­тхыщтхэр.

Гъэтхапэм и 15-м къыще­гъэжьагъэу жъоныгъуакIэм и 21-м нэс я 4-рэ классым исхэм (урысыбзэмкIэ, хьисапымкIэ ыкIи тыкъэзыуцухьэрэ дунаимкIэ) классым щеджэхэрэм (урысыбзэмкIэ, хьисапымкIэ, тари­хъымкIэ, биологиемкIэ), я 6-рэ ыкIи я 8-рэ классхэм — (хьисапымкIэ, урысыбзэмкIэ), я 7-рэ классхэм арысхэм (хьисапымкIэ, урысыбзэмкIэ, биологиемкIэ, тарихъымкIэ, географиемкIэ, физикэмкIэ, обществознаниемкIэ) заушэтыщт.

Мы уплъэкIун IофшIэнхэр шIокI имыIэу атхынхэ фае. Ащ нэмыкIэу я 7-рэ классым ис кIэлэеджакIохэм мэлылъфэгъум и 1-м къыщегъэжьагъэу жъо­ныгъуакIэм и 21-м нэс инджы­лызыбзэмкIэ, французыбзэмкIэ е нэмыцыбзэмкIэ яшIэныгъэхэр къагъэлъэгъощтых.

Джащ фэдэу я 6-рэ ыкIи я 8-рэ классхэм гъэтхапэм и 15-м къыщегъэжьагъэу ежь-ежьырэу къыхахыгъэ предметитIумкIэ заушэтын фэещт. Я 6-рэ классым исхэм — биологиемкIэ, тарихъымкIэ, обществознаниемкIэ, географиемкIэ, я 8-рэ клас­сым исхэм биологиемкIэ, тари­хъымкIэ, географиемкIэ, химиемкIэ, обществознаниемкIэ е физикэмкIэ заушэтыщт.

ДЕЛЭКЪО Анет.