ЦIыфхэр зэрэмысакъыхэрэм тхьамыкIагъо къыздихьэу къы­хэкIы. МашIом зыкъымыштэнымкIэ шапхъэхэр амыгъэ­цакIэми хъунэу зылъытэхэрэм загъорэ тарехьылIэ.

МашIом къыздихьырэ тхьамыкIагъохэр къэмыхъунхэм зынаIэ тезыгъэтырэ къулыкъу­хэм яинспекторхэм ренэу рейд­хэр республикэм щызэхащэх. Ахэр цIыфхэм адэгущыIэх, ма­шIом зыкъымыштэнымкIэ шIэ­гъэн фаехэр зэрыт тхьапэхэр МЧС-м иIофышIэхэм афагощых. Урысыем и МЧС Адыгэ ­РеспубликэмкIэ и ГъэIорышIэпIэ шъхьаIэ республикэм исхэм джыри зэ агу къегъэкIыжьы чъыенхэу чэщрэ гъолъыжьыхэ е унэм къикIыхэ зыхъукIэ, электрическэ пкъыгъохэмрэ хьакухэмрэ язытет ауплъэ­кIунэу, электричествэр зэрыкIорэ гъучIычхэр зызэщыкъо­хэкIэ специалистхэм къяджэнхэу, хьакухэмрэ IугъоищыпIэ­хэмрэ язытет ренэу гъунэ лъа­фынэу, кIэлэцIыкIухэр яза­къоу унэм къырамынэнхэу.

МашIом зыкъызиштэкIэ, шъу­мыщтэу телефонхэу 01-мкIэ е 101-мкIэ псынкIэу шъуафытеуи, тхьамыкIагъор къызыщыхъугъэ чIыпIэр яшъуIу. МашIом игъэкIосэнкIэ шъуфэлъэкIыщтыр зэкIэ шъушIэ. Ар шъуфэмы­гъэкIуасэ зыхъукIэ гъунэгъухэм макъэ яжъугъэIуи, унэм шъукъикI. Мылъкум икъэгъэ­нэжьын уахътэ ешъумыгъахь, унэм къикIынхэмкIэ зыныбжь хэкIотагъэхэм, кIэлэцIыкIухэм, сэкъатныгъэ зиIэхэм IэпыIэгъу шъуафэхъу. МэшIогъэкIуа­сэхэр къызысхэкIэ, унэм  джыри зыгорэхэр къызэри­нагъэр яшъуIу. ТхьамыкIагъом илъэхъан шъхьаныгъупчъэхэмрэ балконхэмрэ шъукъямыпкIэх.

НахьыбэрэмкIэ цIыфхэм хьадэгъур къафэзыхьырэр мэшIожь гъозыр ары. Унэ нахь пэIудзыгъэм шъуихьи, пчъэр пытэу фэшъушI, ащ ынэзхэм хъэдэныжъхэр бэу адашъуку. Шъхьаныгъупчъэм шэкI горэ къижъугъэщи, унэм шъузэрисыр къяжъугъашI.

Мамый Амир. МэшIогъэкIосэнымкIэ Мые­къуапэрэ Мыекъопэ рай­онымрэ якъэралыгъо ин­спектор.