Коронавирусыр къызэуталIэхэрэм япчъагъэ нахь макIэ зэрэхъурэм къыхэкIыкIэ шапхъэу аштэгъагъэхэм ащыщхэр атырахыжьых. Сымэджэщхэм къяуалIэхэрэм ипчъагъи зэхапшIэу къыщыкIагъ, отделениехэм ыпэкIэ Iоф зэрашIэщтыгъэм техьажьых.

ГущыIэм пае, республикэ проектэу «Тинахьыжъхэр» зыфиIорэм къыдыхэлъытагъэу гериатрическэ отделениеу Мыекъопэ къэралыгъо клиническэ сымэджэщым щагъэпсыгъэм иIофшIэн лъыпедзэжьы. ПIэкIор 20 ащ щагъэуцугъ. Джащ фэдэу Красногвардейскэм дэт сы­мэджэщым гериатрическэ IэпыIэгъу арагъэгъотынэу пIэкIоритIу чIагъэуцуагъ.

Отделением къекIолIэрэ нахьыжъхэр ауплъэкIущтых, хэушъхьафыкIыгъэ программэ афызэхагъэуцонышъ ахэр агъэгъолъыщтых ыкIи япсау­ныгъэ изытет пIэлъэ кIыхьэм къыкIоцI лъыплъэщтых.

Участковэ терапевтым къытхыгъэм елъытыгъэу гериатрическэ отделением зыныбжь хэкIотагъэхэр екIуалIэх. Непэрэ мафэм ехъулIэу нэбгырэ 90-м ехъумэ мыщ щяIэзагъэх.

(Тикорр.).