ИкIыгъэ илъэсым къыщегъэжьагъэу непэ къызнэсыгъэм уз мэхъаджэу коронавирусым цIыфхэр егъэгумэкIых. Непэ ситхыгъэ зыфэгъэхьыгъэр а уз Iаем ехьылIагъэу мэзаем и 9-м гъэзетэу «Адыгэ мэкъэм» иIофышIэу Къэзэнэ Юсыф къыхиутыгъэ тхыгъэу «Щынэгъо узым къыгъэущыгъэ гупшысэхэр» зыфиIорэм гупшысэу сигъэшIыгъэхэр ары.

Мы тхыгъэм сызеджэм сэри сшъхьэ гупшысабэ къихьагъ. Сэ еджэгъэшхоу сыщытэп, ау къэзгъэшIагъэм слъэгъугъэр, сызэрихьылIагъэр макIэп. Ахэр сшъхьэ къинэжьыгъэх. Дунаи­шхом утетыфэ къини хъяри узэримыхьылIэн щыIэп.

Непэ мы уз мэхъаджэр зынэмысыгъэ къэралыгъо щыIэжьэп. Телевизорым сыдигъо уеплъыгъэми, джащ фэд гъэзет нэкIубгъохэри, ащ фэгъэхьыгъэ къэбар нэмыкI арыплъагъорэп. Ау тэ сыдым тыфит, къэралыгъохэр зэкIэ амалэу яIэмкIэ мы узым ебэных. Джары цIыфмэ зыкIа­Iуагъэр «Узыр гужъуакIэм дэлъ». Тхьэм къыпфихьын ыкIи птырихыжьын ылъэкIыщт.

Мы уз мэхъаджэм упэшIуе­кIоныр псынкIагъоп. Медицинэм иIофышIэхэр чэщи мафи ямыIэу ащ ебэных. Ахэм къатенэрэ щыIэп, тхьаегъэпсэушхо япIоныр атефэ. Ау, гукъау нахь мышIэми, цIыфхэм икъоу къагурыIорэп Iофым изытет ишъыпкъапIэ, врачхэм аIорэр агъэцакIэхэрэп, Iэпэдэлэл ашIы. Узым зыщыухъумэгъэным пае нэгуихъор, Iалъэр бгъэфедэнхэ фаеу ренэу къаIо нахь мышIэми, нахьыбэм ар агъэцакIэрэп. Узым зэхэдз иIэп, ар къызэолIэщтыр зыми ышIэрэп.

Мы узыжъым тищыIэныгъэ бэ щызэблихъугъэр. Тилъэпкъ цIыкIукIэ чIэтынагъэр макIэп. Гукъау нахь мышIэми, егъашIэм шэн-хабзэу тхэлъыгъэр зэщыкъуагъэ хъугъэ. Хьадэм ифэIо-фашIэхэр зэрищыкIагъэм фэдэу дгъэцэкIэжьышъухэрэп. Лъэшэу гукъау, щэIэгъуай, ау сыдым тыфит?

Унагъом къин ыкIи хъяр къы­фыкъокIыгъэмэ зэрэчылэу зэшIуахыщтыгъэ. Сыд джы непэ къытэхъулIагъэр? КъэIогъуай, гур ефырзы, нэпсыр къэкIо. Уиунагъо къихъухьагъэу, щапIугъэу узэрэгушхощтыгъэ лъфыгъэм (коронавирусыр къызыхагъэщыгъэм) идунай зихъожьыкIэ уекIолIэн, бгъэтIылъыжьын уфитэп. Къин къызфыкъокIыгъэ унагъом ыдэжь удэхьанкIэ, уфэтхьаусыхэнкIэ ощынэ. Аужы­пкъэм цIыфэу пшIэщтыгъэм идунай зихъожьыкIэ къыуаIощтэп. ЗэкIэмэ анахь гукъао хъурэр мы узыжъым илIыкIы­гъэр къэм щагъэтIылъы зыхъукIэ джыназэ нэмаз зышIын цIыф щыIэжьэп. Мы уз мэхъаджэм къызыдихьыгъэ тхьамыкIэгъуабэ непэ зэшIотхын фаеу щыIэныгъэм ащ фэдэ чIыпIэ тыригъэуцуагъ. Ащ зедгъэгупсэфылIэ хъущтэп, зэкIэми тызэкъотэу ащ тебэнын фае. Ащ пае хэти къы­тефэрэр ыгъэцэкIэным мэхьанэшхо иI.

Тикъэралыгъошхо зауи, гъабли, узи пэкIэкIыгъэр бэ. Непэ Урысыем и Президентэу В. Пу­ти­­ныр мы тхьамыкIэгъошхоу къыт­фыкъокIыгъэм лъэшэу егъэ­гумэкIы. Ащ ебэныгъэным ыкIуа­чIэ зэкIэ рихьылIи, вакцинэр апэу Урысыем къыща­шIыгъ. Джы непэ ар къэралыгъо пчъагъэмэ агъэфедэ. Ащ урымыгушхон плъэкIырэп. Джащ фэдэу мы уз щынагъор тирес­публикэ къызихьагъэм щыублагъэу Адыгеим и ЛIышъхьэу КъумпIыл Мурати ылъэкI къэмынэу цIыфхэм ынаIэ атет. Ащи лъэшэу тыфэраз.

Къинэу къытфыкъокIыгъэм икъэкIуакIэ фэдэу икIожьыкIи псынкIэ хъунэу Тхьэм телъэIу.

Хъодэ Сэфэр. IофшIэным иветеран.