Адыгеим осышхо къызыщесым шъолъыр операторым хэкIыр зэрэдищырэм зэхъокIыныгъэхэр фэхъугъагъэх, ау джы ащ графикым тетэу иIофшIэн лъегъэкIуатэ.

Муниципальнэ образованиехэм урам шъхьаIэхэм ягъогухэр аукъэбзыгъэхэти, хэкIыр Iузыщырэ автомашинэхэм язекIон нахь псынкIэ хъугъэ. Арэу щытми, ахэм къапэIулъхэм уадэхьаныр джыри къин. Ащ фэшI унэе псэупIэхэм ачIэсхэм хэкIыр урам зэхэкIыпIэхэм анэс къахьынэу шъолъыр операторыр къялъэIу.

— Осышхо къызесым тиавтомашинэхэр хэкIитэкъупIэ площадкэхэм ямыкIолIэшъухэу, тиIофшIэн зэхъокIыныгъэхэр фэтшIынхэ фаеу хъугъагъэ. Джы ахэр зэкIэ укъэбзыгъэх, осыри къэжъужьы, арышъ, графикым тытехьажьыгъ, — къы­Iуагъ «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Телефонэу шъукъызэрэтеон шъулъэкIыщтхэр шъугу къэтэгъэкIыжьых: 8-800-707-05-08 ыкIи 8(8772)21-06-00. «Линие плъырым» мафэ къэс, пчэдыжьым сыхьатыр 7-м къыщегъэжьагъэу пчыхьэм 8-м нэс, Iоф ешIэ, зыгъэпсэфыгъо ыкIи мэфэкI мафэхэри ащ хэхьэх.

Джащ фэдэу пыдзафэхэм ядэщын епхыгъэ упчIэ зиIэхэр диспетчерскэ къулыкъуми пчэдыжьым 8-м къыщыублагъэу 17.00-м нэс къытеонхэ алъэкIыщт. Номерыр: 8-962-868-14-62.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.

НэкIубгъор зыгъэхьазырыгъэр Хъут Нэфсэт.