ЯIофшIэн осэшIу къыфишIыгъ

Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм 2020-рэ илъэсымкIэ иIофшIэн зэфихьысыжьыгъ. Ащ хэлэжьагъэх АР-м и МВД иминистрэ иIэнатIэ охътэ гъэнэфагъэкIэ зыгъэцэкIэрэ БрантI Мурадин, хэгъэгу кIоцI къулыкъум ичIыпIэ отдел ипащэу Щащэ Артур, ащ игуадзэхэр, подразделениехэм япащэхэр.

БрантI Мурадин пэублэ гущыIэм къызэрэщиIуагъэм­кIэ, пандемием ыпкъ къикIыкIэ 2020-рэ илъэсыр зэрэхьылъагъэм емылъытыгъэу отделым пшъэрылъэу иIагъэхэр икъоу гъэцэкIагъэхэ хъугъэ. Джащ фэдэу полковникым къызэрэхигъэщыгъэмкIэ, АдыгеимкIэ мы чIыпIэ къулыкъум иотдел Iоф щызышIэхэрэм япчъагъэ нахьыб, арышъ Мыекъуапэ иполицие икъулыкъушIэхэм шIуагъэ къытэу яIофшIэн зэхащэным мэхьанэшхо раты.

Нэужым къулыкъум иIофшIэн зыфэдагъэм нахь игъэкIотыгъэу къытегущыIагъ полицием иподполковникэу Игорь Овчинниковыр.

Ащ къызэриIуагъэмкIэ, 2020-рэ илъэсым къалэм щызэрахьэгъэ бзэджэшIагъэхэм япчъагъэ къеIыхыгъ. ЗэкIэмкIи блэкIыгъэ илъэсым Мыекъуапэ хабзэр щаукъуагъэу хъугъэ-шIэгъэ 1797-рэ къыхагъэщыгъ. Мы уахътэм къыриубытэу хъункIэн ыкIи зэон, машинэр зэрэIуафыгъэм, псэупIэхэр зэрахъункIагъэм япхыгъэ бзэджэшIагъэхэу зэрахьагъэхэр нахь макIэ хъугъэх. Ащ нэмыкIэу наркотикыр хэбзэнчъэу къызэрэра­гъэкIокIырэм епхыгъэу 179-рэ къычIа­гъэщыгъ.

Джащ фэдэу зэхахьэм къызэрэщаIуагъэмкIэ, пэшIорыгъэшъ Iофтхьабзэхэм язэхэщэнкIэ Общественнэ советыр IэпыIэгъушхо къафэхъу. Хэгъэгу кIоцI къулыкъум иIофшIэн хэхьэрэ лъэныкъо пстэури къызэлъаубытызэ шIуагъэ къэзытырэ Iофтхьабзэхэр зэхащэх.

Iофтхьабзэм икIэухым отделым икъулыкъушIэхэм тапэкIэ анахьэу анаIэ зытырагъэтыщт лъэныкъохэр агъэнэфагъэх.

Зэнэкъокъум зэфэхьысыжьхэр фашIыгъэх

 

Наркотикхэм апэшIуекIогъэным фытегъэ­псыхьэгъэ социальнэ рекламэу «Тызэгъусэу щыIэныгъэр къэтэжъугъэухъум» зыфиIорэм ишъолъыр зэнэкъокъу икIэуххэр зэфахьысыжьыгъэх.

Жюрим хэтыгъ АР-м хэгъэгу кIоцI IофхэмкIэ и Министерствэ дэжь щызэхащэгъэ Общественнэ советым итхьаматэу Светлана Дорошенкэр. Зэнэкъокъум IофшIэгъи 120-м ехъу къырахьылIагъ.

АР-м гъэсэныгъэмрэ шIэныгъэмрэкIэ и Министерствэ, АР-м хэгъэгу кIоцI IофхэмкIэ и Министерствэ наркотикхэр хэбзэнчъэу къезыгъэкIокIыхэрэм алъыплъэрэ иотдел, къэбарлъыгъэIэс амалхэм ыкIи общественнэ организациехэм ялIыкIохэм яIэпыIэгъукIэ ар рагъэкIокIыгъ.

ЗэхэщакIохэм къызэрэхагъэщыгъэмкIэ, мы илъэсым социальнэ рекламэм епхыгъэ IофшIэн гъэшIэгъонхэр къырахьылIагъэх. Непэ наркотикхэм япхыгъэу респуб­ликэм щыхъурэ-щышIэхэрэр, ахэм зэрябэныхэрэр рекламэу къагъэхьазырыгъэхэм къыраIотыкIых.

Джащ фэдэу специалистхэм къызэрэхагъэщыгъэмкIэ, зэнэкъокъум IофшIэнэу къырахьылIагъэхэр нахьыбэу зыфэгъэхьыгъагъэр Iугъо къызыпымыкIырэ наркотик зыхэлъ тутын лъэпкъэу «Снюсыр» ыкIи ащ иягъэ кIэлэеджакIохэм къызэрякIырэр ары. IофшIэнхэм янахьыбэм игъэкIотыгъэу къыраIотыкIыгъ наркотикым пыщагъэ хъугъэ цIыфыр гъогу занкIэ тебгъэ­хьажьын зэрэплъэкIыщтыр.

Лъэныкъоу «Наркотикхэм апэшIуекIогъэным ыкIи псауныгъэм зэрар езыхырэ шIыкIэхэр щыгъэзыегъэнхэмкIэ анахь буклет дэгъур» зыфиIорэмкIэ хагъэунэфыкIырэ чIыпIэхэр къыдахыгъэх кIэлэегъаджэхэу Оксана Давыдовам, Елена Быстрых ыкIи Диана Кожубековам.

«Наркотикым къыкIэупчIэхэрэм япчъагъэ нахь макIэ шIыгъэным епхыгъэ макет анахь дэгъур» зыфиIорэмкIэ текIоныгъэр фагъэшъошагъ Мыекъопэ медицинэ училищым истудентэу Михаил Федосеевым. Видеокъэ­гъэлъэгъон анахь дэгъур къэзышIыгъэу къыхагъэщыгъэр Тэхъутэмыкъое районым ит гурыт еджапIэу N 15-м икIэлэеджакIоу Глеб Лянко.

Зэнэкъокъум текIоныгъэ къыщыдэзыхыгъэхэм яIоф­шIагъэхэр Москва рагъэхьыщтых, федеральнэ зэнэкъо­къум иедзыгъо Адыгеир къыщагъэлъэгъощт.

Хьэхэр зыщагъа­сэрэ къулыкъум щыIагъэх

Урысые Iофтхьабзэу «Студенческий десант» зыфиIорэм хахьэу Адыгэ къэралыгъо университетым ыкIи Мыекъопэ къэралыгъо технологическэ университетым ястудентхэр АР-м хэгъэгу кIоцI IофхэмкIэ и Министерствэ икинологическэ къулыкъу гупчэ кIогъагъэх.

ХьакIэхэм къапэгъокIыгъ подразделением ипащэу, полицием имайорэу Владислав Прокофьевыр. ЗекIор рамыгъажьэзэ къулыкъоу зипащэм тарихъэу пылъыр, агъасэрэ хьэхэр зыфэдэхэр, полицием ахэр иIэпыIэгъушIоу зэрэщытхэр В. Прокофьевым студентхэм къафиIотагъэх.

«2020-рэ илъэсым къулыкъушIэ хьэхэм яшIуагъэкIэ бзэджэшIэгъи 140-рэ къыхагъэщыгъ. Оперативнэ Iоф­тхьабзэу зэхащагъэхэм къакIэлъыкIоу наркотик зы­хэлъ вещество грамми 4, джащ фэдэу хэбзэнчъэу агъэфедэщтыгъэ Iэши 7 къапкъырахыгъэх», — къыIуагъ майорэу Прокофьевым.

Мы уахътэм ехъулIэу къулыкъум иIофшIэн хьэ 60-м ехъу щагъэфедэ. Ахэм азыныкъор нэмыц овчаркэх, общественнэ рэхьатныгъэр къэухъумэгъэнымкIэ ахэм яшIогъэшхо къэкIо. Адрэ хьэ лъэпкъэу «лабрадоркIэ» заджэхэрэр наркотикым икъычIэгъэщын, къэорэ пкъы­гъохэм ыкIи Iашэхэм якъэгъотын фэгъэзагъэх.

КъулыкъушIэхэм студентхэм нэрылъэгъу афашIыгъ хьэхэр зэрагъэIорышIэхэрэр. Наркотик зыхэлъ веществоу бгъэфедэ мыхъущтыр загъэбылъым, нэгъэупIэпIэгъукIэ ар хьэм къыгъотыгъ.

Гупчэм иIофшIэн игъэкIотыгъэу зыщагъэгъуазэзэ студентхэм яупчIэхэр къулыкъушIэхэм афагъэзагъэх ыкIи игъэкIотыгъэ джэуапхэри къаратыжьыгъэх.

Зылъыхъущтыгъэ­хэр къаубытыгъ

Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм джырэблагъэ пэшIорыгъэшъ Iофтхьабзэхэр рес­публикэ гупчэм щызэрихьагъэх. Ахэм яшIуагъэкIэ зыгорэм имылъку зэритыгъу­гъэм къы­хэкIэу илъэсныкъо хъугъэу федеральнэ лъы­хъуным щыIэгъэ илъэс 41-рэ зыныбжь хъулъ­фыгъэр зыдэщыIэр агъэунэ­фыгъ.

Ащ нэмыкIэу зылъыхъущтыгъэхэ илъэс 34-рэ зыныбжь хъулъфыгъэр Джэджэ районым къыщаубытыгъ. ЫпэкIэ ащ хьапс телъыгъ, цIыфым ипсауныгъэ зэрар зэрэрихыгъэм къыхэкIэу ар агъэмысэ. Мы уахътэм ар изоляторым чIэс.

АР-м и МВД цIыфхэм агу къегъэкIыжьы, ведомствэм иофициальнэ сайт иедзыгъэу «Розыск» зыфиIорэм зылъыхъухэрэ цIыфэу итхэр зыдэщыIэхэм щыгъуа­зэхэмэ полицием ителефон номерэу 02-мкIэ е мобильнэ телефонэу 102-мкIэ макъэ къарагъэIунэу.

Ешъуагъэу водитель 12 къагъэуцугъ

Адыгеим и Къэралыгъо автоинспекцие икъулыкъушIэхэм ешъуагъэу рулым кIэрысыгъэ водитель 12 къагъэуцугъ.

МэфэкI зыгъэпсэфыгъо мафэхэм, мэзаем и 21-м къыщегъэжьагъэу и 23-м нэс, Адыгэ Республикэм игъогухэм цIыф зыхэкIодэгъэ хъугъэ-шIагъэ ащагъэу­нэфыгъэп. Ащ нэмыкIэу мы уахътэм къыриубытэу гъогухэм къатехъухьэгъэ хъугъэ-шIэгъэ 21-м зыпари ахэкIодагъэп. Нахьыбэу ащ фэдэхэр зыщагъэунэфыгъэхэр Тэхъутэмыкъое районыр ыкIи къалэу Мые­къуапэ арых.

Къэралыгъо автоинспекцием къызэритыгъэмкIэ, мы мафэхэм гъогурыкIоным ишапхъэхэр аукъуагъэхэу гъогогъу 800 фэдизрэ къыхагъэщыгъ. Ешъуагъэхэу рулым Iусыгъэ водитель 12-мэ административнэ пшъэ­дэкIыжьхэр арагъэхьыгъэх. ЛъэсрыкIо 63-мэ алъэныкъокIэ административнэ протоколхэр зэхагъэуцуагъэх.

НэкIубгъор зыгъэхьазырыгъэр КIАРЭ Фатим.