Хэгъэгум футболымкIэ иапшъэрэ куп хэт клуб­хэм 2020 — 2021-рэ илъэс зэнэкъокъум хэ­хьэрэ я 20-рэ ешIэгъухэр мэзаем и 26 — 28-м яIагъэх.

КIымэфэ зэпыугъор аухи, фут­бол клубхэм зэнэкъокъум пауб­лэжьыгъ.

ЕшIэгъухэр

«Зенит» — «Ростов» — 2:2, «Химки» — «Уфа» — 2:1, «Локомотив» — ЦСКА — 2:0, «Тамбов» — «Ротор» — 1:3, «Ахмат» — «Динамо» — 1:2, «Спартак» — «Рубин» — 0:2, «Шъачэ» — «Арсенал» — 4:0, «Краснодар» — «Урал» — 2:2.

«Ростов» «Зенит» зэрэде­шIа­гъэр, «Химки» 2:0-у «Уфа» те­кIозэ, я 89-рэ такъикъым Камиловым къэлапчъэм Iэгуаор ди­дзи, пчъагъэр 2:1 зэрэхъугъэр, «Динамэм» Грознэм текIоныгъэр къызэрэщихьыгъэр, нэмыкI зэ­IукIэгъухэри гъэшIэгъоныгъэх.

Ижъырэ адыгэ къалэу Шъачэ икомандэ «Арсенал» Тула 4:0-у зэрэтекIуагъэр къыхэтэгъэщы. Заболотнэм, Тереховым, Жаозиньо, Юсуповым зырызэ къэлапчъэм Iэгуаор дадзагъ. «Шъа­чэ» Европэм икубокхэм афэбэнэщтхэм ащыщ хъун ылъэкIыщтэу тренер шъхьаIэу Владимир Федотовым къызэриIуагъэм узэгупшысэн хэлъ.

«Локомотив» ЦСКА-м 2:0-у текIуагъ. Къэлапчъэм Iэгуаор дэзыдзэгъэ Крыховяк къыIуагъ «Локомотив» иешIакIэ зэрэхи­гъахъорэр. ЦСКА-м ешIэгъур шIуа­хьыгъэми, игуетныгъэ къемы­Iыхыщтэу тэлъытэ. «Ахмат», «Зе­нит», «Спартак», нэмыкIхэм шIэхэу аIукIэщт, клубыр зэнэ­къокъум зэрэфэхьазырыр къэ­лъэгъощт.

«Ротор» ауж къинэрэ «Тамбовым» текIуагъ, хъагъэм Iэгуаор дидзэным фэшI шIыкIэшIу­хэр къыгъэлъэгъуагъэх.

«Спартак» «Рубин» зыдешIэм, зэIукIэгъур зыхьыщтыр къызынэфагъэр я 89-рэ такъикъыр ары. Деспотович ятIонэрэу хъагъэм Iэгуаор дидзагъ. «Спартак» къэ­зыгъэзэжьыгъэ футбол ешIэкIо цIэрыIоу Промес исэнаущыгъэ нахь къызэIуихыным фэшI игъу­сэхэм ялъытыгъэр бэ.

ЗэIукIэгъум иешIэкIо анахь дэ­гъоу зэхэщакIохэм къыхахы-гъэр Хвича Кварацхелия. «Рубин» ыпэ­кIэ лъызыгъэкIуатэрэмэ ар ащыщ.

«Краснодар» къыхьын фэе ешIэ­гъум гумэкIыгъохэр къыфе­хьых. Магомед Сулеймановым я 12-рэ такъикъым «Урал» икъэ­ла­п­чъэ Iэгуаор дидзагъ. «Краснодар» икъэлэпчъэIут ныбжьыкIэу Агкацевыр цыхьэшIэгъоу ешIэу къыхэкIыми, бащэрэ хэу­къо. «Урал» хъагъэм Iэгуаор тIо зыдедзэм, къэлэпчъэIутыр лъэшэу хэукъуагъ.

Я 85-рэ такъикъым Кабеллэ шъхьэкIэ дахэу къэлапчъэм Iэгуаор дидзагъ — 2:2. Арэу щытми, «Краснодар» очкоуи 2 чIинагъ къыхьын фаеу.

Хэт тыдэ щыIа?

1. «Зенит» — 42 2. ЦСКА — 37 3. «Шъачэ» — 36 4. «Спартак» — 35 5. «Ростов» — 33 6. «Динамо» — 33 7. «Локомотив» — 31 8. «Краснодар» — 31 9. «Рубин» — 31 10. «Химки» — 28 11. «Ахмат» — 26 12. «Урал» — 22 13. «Ротор» — 17 14. «Арсенал» — 14 15. «Уфа» — 13 16. «Тамбов» — 13. Я 21-рэ зэIукIэгъухэр 06.03-м рагъажьэх «Рубин» — «Зенит» «Урал» — «Уфа» «Арсенал» — «Локомотив» «Ростов» — «Шъачэ» «Динамо» — «Ахмат» «Спартак» — «Краснодар» «Ротор» — «Химки».