КIэлэцIыкIоу зы­ныбжь илъэси 3-м шIомыкIыгъэхэм апае ахъщэ ты­нымкIэ тхылъхэр унагъохэм зэрагъэпсыщт шап­хъэхэм зэхъо­кIыныгъэхэр афэхъугъэх. Ахэм гъэтхапэм и 1-м къыщыублагъэу кIуачIэ яI. Зэпахырэ узэу дунаир зэ­лъызыкIугъэр къызежьэм, ахэр нахь къызэрыкIо ашIыгъагъэх, пIалъэр икIыгъэмэ, социальнэ фэIо-фашIэхэр зыгъэцэкIэхэрэ къулыкъухэм ежьхэм агъэ­псыщтыгъэх. Джы ны-тыхэм лъэIу тхылъыри, нэмыкIэу ищы­кIа­гъэхэри ежьхэм ашъхьэкIэ атынхэ фае.

Унагъом лъэIу тхылъыр кIэлэцIыкIур къызыхъукIэ апэрэу еты ыкIи нэужым, ыныбжь илъэс хахъо къэс, икIэрыкIэу етхыжьы. Зыщыпсэурэ чIыпIэр зызэблихъукIи кIитыкIыжьын фаеу щыт.

УФ-м IофшIэнымкIэ ыкIи цIыфхэр социальнэу къэухъу­мэгъэнхэмкIэ и Министерствэ къызэритыгъэмкIэ, социальнэ Iофхэм афэгъэзэгъэ къулыкъу­хэм е лъэныкъуабэ къызэлъызыубытырэ гупчэм уякIуалIэми пIахыщт, къэралыгъо фэIо-фа­шIэхэм япортал бгъэфедэни плъэкIыщт.

Шапхъэу непэ щыIэхэм къызэращыдэлъытагъэмкIэ, унагъом гъотэу иIэр, гурытымкIэ лъы­тагъэу, узэрэпсэун плъэкIыщт ахъщэ анахь макIэу агъэнэ­фагъэм фэдитIум нэмысырэмэ, мы пособиер къыфэкIонэу къытефэ.