УФ-м и Президентэу Владимир Путиным бизнесым щылажьэу зэпа­хырэ узэу дунаир зэлъызыкIугъэм иягъэ зэригъэкIыгъэхэм кредит яты­гъэ­ным фытегъэпсыхьэгъэ программакIэу агъэхьазырыгъэм дыри­гъэштагъ.

НахьыпэкIэ кредитым процен­ти 2 тегъэхъуагъэу атыщтыгъ, джы процентхэр 3 ашIыгъэх, ау программэм предприятие ини, цIыкIуи хэлэжьэнхэ алъэкIыщт.

Урысыем и Правительствэ и Тхьаматэу Михаил Мишустиным УФ-м ФедерациемкIэ и Совет ипащэхэм зэIукIэгъоу адыри­Iагъэм къызэрэщиIуагъэмкIэ, программэм зэхъокIыныгъабэ фэхъугъ, компаниехэм хэхъоныгъэхэр ашIынхэм ар фэIорышIэщт. Къэралыгъом иэко­номикэ цIыкIу-цIыкIоу зэрэзэтеуцожьырэр ары процентхэр къа­Iэтынхэм ушъхьагъу фэхъугъэр.

Программэм къызэрэщыдэлъытагъэмкIэ, кредитым илъэс пIалъэу иI, ар зыгъэпсырэм 2021-рэ илъэсым иапэрэ мэзих чIыфэри, процентэу техъохэрэри ытыщтхэп, ятIонэрэ илъэсныкъом, мазэ къэс зэфэдэу тегощагъэу, ытыжьыщт. Ащ хэлажьэмэ зышIоигъохэм гъэтхапэм и 9-м тхылъхэр атынхэу рагъэжьэн алъэкIыщт.

Михаил Мишустиным нэбгырэ миллионрэ мин 500-рэ фэдизмэ IофшIэпIэ чIыпIэхэр къя­зытыгъэ предприниматель мин 75-мэ мы IэпыIэгъур агъэ­федэщтэу пэшIорыгъэшъэу къа­лъытагъэу къыIуагъ. Ащ къызэ­рэкIигъэтхъыгъэмкIэ, а уахътэм къыкIоцI зэпахырэ узым пэшIуе­кIорэ вакцинэр зищыкIагъэхэм анахьыбэхэм ахэлъхьагъэ хъунышъ, бизнесым къытырэ фэIо-фашIэхэр нахьыбэу агъэфедэнхэм, ащ щылэжьэрэ хъызмэтшIапIэхэм зэтеуцожьынхэ амал яIэным пащэхэр щэгугъых.