Адыгеим и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат пшъэрылъ зэрафишIыгъэм тетэу шъолъырхэм язэдэлэжьэныгъэ зезыгъэушъомбгъурэ Адыгэ фондым имылъкукIэ къащэфыгъэ тифлотехническэ оборудованиякIэм фэгъэхьыгъэ лъэтегъэуцор хьафизэхэм я Адыгэ республикэ тхылъеджапIэ щыкIуагъ.Iофтхьабзэм хэлэжьагъэх Адыгэ Республикэм культурэмкIэ, IофшIэнымрэ социальнэ хэхъоныгъэмрэкIэ яминистерствэхэм, шъолъырхэм язэдэлэжьэныгъэ зезыгъэушъомбгъу­рэ Адыгэ фондым, дэеу зылъэ­гъухэрэм яобщественнэ организациехэм япащэхэр, партиеу «Единэ Россием», НыбжьыкIэ гвардием ялIыкIохэр, къэбар- коммуникационнэ технологиехэр зыгъэфедэхэрэр.

«ЗэIукIэм хэлэжьагъэхэм дэеу зылъэгъухэрэм атегъэ­псыхьэгъэ еджэпIэ чIыпIэр, Clear Peader+ зыфиIорэ машинэу документыр сканировать зышIырэр ыкIи ащ итым къе­джэжьырэр арагъэлъэгъугъэх, — къыIуагъ партием ишъолъыр къутамэ и Секретарь игуадзэу, Мыекъопэ къэлэ Советым идепутатэу АфэшIэгъо Рэмэзан. — ХьафизэхэмкIи дэеу зылъэгъухэрэмкIи ар IэпыIэгъушIоу щыт. Мы техникакIэм ишIуа­гъэкIэ тхылъеджапIэм къакIо­хэрэм материалыкIэхэм нэIуа­сэ зафашIын алъэкIыщт».

АфэшIэгъо Рэмэзан зэIукIэм хэлажьэхэрэм агу къызэригъэ­кIыжьыгъэмкIэ, оборудованиер къаIэкIэхьанымкIэ зишIуагъэ къэкIуагъэр хьафизэхэм я Адыгэ республикэ тхылъеджапIэ ипащэу Ирина Корниенкэм партием ишъолъыр къутамэ и Секретарэу КъумпIыл Мурат тыгъэгъазэм и 1-м зызэрэфигъэзэгъагъэр ары. Ащ ыуж мэфэ заулэ нахь темышIэу хьафи­зэхэм яучреждение сомэ мин 588-у къыIукIагъэмкIэ дэеу зылъэгъухэрэр зыщеджэщтхэ чIыпIэ зэтырагъэпсыхьагъ, зы­фэныкъо компьютерхэри къащэфыгъэх.