ЗыкъэухъумэжьынымкIэ къэралыгъом иорганизациеу «ОСОАВИАХИМ — Урысыем и ДОСААФ» зыфиIорэр зызэха­ща­гъэр илъэс 94-рэ, Урысыем иухъумакIохэм я Мафэ ыкIи Хэ­гъэгу зэошхом илъэхъан нэмыц техакIохэр рафыжьыхи, Адыгеир шъхьафит зашIыжьыгъэр илъэс 78-рэ зэрэхъугъэхэм афэгъэхьыгъэ Iэнэ хъурае Урысыем и ДОСААФ ишъолъыр къутамэ щыкIуагъ.

Iофтхьабзэм хэлэжьагъэх АР-м ихэбзэгъэуцу ыкIи гъэцэ­кIэкIо къулыкъухэм ялIыкIо­хэр, ветеранхэр ыкIи Адыгэ зыкъэухъумэжьын организацием иучреждениехэм якъулы­къушIэхэр, АР-м иветеранхэм я Совет, АР-м идзэ комиссариат ялIыкIохэр, дзэ-патриот клубхэм ыкIи объединениехэм яIофышIэхэр, Адыгеим иныбжьы­кIэ армейцэхэр, общественнэ ор­ганизациехэм ыкIи объедине­ниехэм ялIыкIохэр, нэмыкIхэри.

КъэIогъэн фае, 2021-рэ илъэ­сым щылэ мазэм и 23-м къыщегъэжьагъэу Урысые зыкъэу­хъумэжьын жъугъэ IофшIэным имазэ рагъэкIокIыгъ, ащ изэ­фэхьысыжьхэри ашIыгъэх.

ЗэхэщакIохэм мурадэу яIагъэр дзэ-патриотическэ пIуныгъэм фэгъэхьыгъэ Iофтхьабзэ­хэм цIыфхэр ыкIи организацием илIыкIохэр чанэу къахэгъэлэжьэгъэнхэр ары.

Урысыем и ДОСААФ ишъо­лъыр къутамэ ипащэу Барцо Тимур Iофтхьабзэм къекIолIагъэхэм шIуфэс гущыIэмкIэ за­къыфигъэзагъ. Ащ къызэриIуагъэмкIэ, Урысые зыкъэухъумэжьын жъугъэ IофшIэныр тирес­публикэ чанэу щырагъэ­кIо­кIыгъ. Пшъэрылъэу яIагъэр щылэ ма­зэм и 23-м къыщегъэжьа­гъэу мэзаем и 23-м нэс патриотическэ ыкIи дзэ-патриотическэ пIуныгъэм ехьылIэгъэ Iофтхьабзэхэм, джащ фэдэу дзэ шIэ­жьым ыкIи Урысые Федерациемрэ Адыгэ Республикэмрэ яшIэжь мафэхэм чанэу ахэлэ­жьэнхэр ары. Iэнэ хъураем къе­кIолIэгъэхэ ведомствэ ыкIи къулыкъу зэфэшъхьафхэм, организациехэм ыкIи объединениехэм ялIыкIохэр зыкъэухъу­мэжьын организациер зызэхащагъэм и Мафэ, Сталинград заом, Ленинград шъхьафит за­шIыжьыгъэм, Хэгъэгу зэошхом илъэхъан нэмыц техакIохэр ра­фыжьыхи, Адыгеир шъхьафит зашIыжьыгъэм, хэгъэгум иухъу­макIохэм я Мафэ фэгъэхьыгъэ Iофтхьабзэу республикэм щыкIуагъэхэм чанэу ахэлэжьагъэх.

— Пшъэрылъ шъхьаIэу тиIоф­шIэнкIэ тиIагъэр тарихъ хъу­гъэ-шIагъэхэр, лъэхъэнэ къинхэм Хэгъэгур къэзыухъумэгъэ цIыф­хэр тыгу къэдгъэкIыжьынхэр, къыткIэхъухьэрэ лIэужхэм ахэр ядгъэшIэнхэр, якъэралыгъо шIу алъэгъоу, къаухъумэным фэ­хьазырхэу пIугъэнхэр ары,— къыIуагъ Барцо Тимур.

Нэужым зэхахьэм къыщыгущыIагъ Урысые дзэ-патриотическэ общественнэ движениеу «Юнармием» икъутамэу къалэу Мыекъуапэ щыIэм иштаб ипащэу Ирина Князевар. Ащ къызэриIуагъэмкIэ, илъэси 8-м къы­щегъэжьагъэу илъэс 18-м нэс зыныбжь нэбгырэ 1015-рэ движением хэтых. Ахэр урысые ыкIи республикэ зэнэкъо­къухэм чанэу ахэлажьэх, ха­гъэунэфыкIырэ чIыпIэхэр къыдахых. Ахэр къэзыушыхьатырэ видео къэгъэлъэгъоным къэзэрэугъоигъэхэр ригъэплъыгъэх.

Джащ фэдэу, Урысые зыкъэу­хъумэжьын жъугъэ IофшIэным имазэу рагъэкIокIыгъэм изэ­фэхьысыжьхэр къашIыгъэх Уры­сыем и ДОСААФ ичIыпIэ къутамэу Тэхъутэмыкъое районым щыIэм ипащэу ЛIыхэсэ Руслъан, Мыекъопэ дзэ-патриотическэ клубэу «Вертикаль» зыфиIорэм ихэушъхьафыкIыгъэ отрядэу «Кондорым» ипащэу Егор Туз, ДОСААФ-м ичIыпIэ къутамэу Теуцожь районым щыIэм ипащэу СтIашъу Аслъан, нэмыкI­хэми.

Iэнэ хъураем къыщыгущыIагъэх АР-м и Къэралыгъо Совет — Хасэм идепутатэу, Урысыем и ДОСААФ ишъолъыр отделение илъыплъэкIо совет хэтэу Е. Саловыр, АР-м иветеранхэм я Совет итхьаматэу Къоджэ Ас­лъан, нэмыкIхэри. Ахэм къы­зэраIуагъэмкIэ, Урысые зыкъэу­хъумэжьын жъугъэ IофшIэным имазэ хахьэу тиреспубликэ Iоф­тхьэбзэ зэфэшъхьафыбэ щыкIуагъ. Ахэм зэкIэми мэхьа­нэшхо яI ыкIи ныбжьыкIэхэм яхэгъэгу шIу алъэгъоу пIугъэнхэм фэIорышIэх.

КIэухым къызэраIуагъэмкIэ, мы илъэсым гъэтхапэм и 24-м Урысыем и ДОСААФ ишъолъыр къутамэ и Совет зэхэсыгъо иIэщт, ащ советым иIофшIэн щызэфахьысыжьыщт, дзэ-пат­риотическэ пIуныгъэм фэгъэ­хьыгъэ Iофтхьабзэхэм чанэу ахэлэжьагъэхэр щытхъу тхылъхэмкIэ къыхагъэщыщтых ыкIи зыкъэухъумэжьынымкIэ къэралыгъо организациеу «ОСОАВИАХИМ — Урысыем и ДОСААФ» зыфиIорэр зызэхащагъэр къи­хьащт илъэсым илъэс 95-рэ зэрэхъущтым изыфэгъэхьазырын епхыгъэ планыр аштэщт.

КIАРЭ Фатим. Сурэтхэр Iэшъынэ Аслъан тырихыгъэх.