Зигугъу къэтшIыщтыр IэрышIыхыр ашIы зэхъум агъэкощыгъэ къоджэ цIыкIу шIагъощтыгъэу Ленинэхьаблэ икIэлэ пIугъэу ХъутIыжъ Азмэт Къэншъао ыкъом епхыгъэу МВД-м иветеранхэм зыкъызэрэтфагъэзагъэр ары.

Мы лIым ыцIэ къепIомэ, цIыф шIа­гъоу, IофшIэкIошхоу, хьалэлэу къэралыгъом фэлэжьагъэу, Адыгеим, милицием иIоф­шIэн шэпхъэ гъэнэфагъэм атетэу щызэхэзыщагъэхэм яапэрэ сатырэхэм ахэ­тыгъэу, иадыгагъэкIи, ицIыфыгъэкIи щысэтехыпIэу, адыгэ хэкум имилицие иапэрэ полковникэу, ащ ипащэ иапэрэ гуадзэу илъэсипшI пчъагъэрэ ищытхъу аригъаIозэ лэжьагъэу зэрэщытыр къыуимыIонэу къулыкъу дэзыхьыгъэхэм ямызакъоу, зышIэхэрэм, цIыфэу фэзагъэхэм къахэкIынэп.

Мы лъэхъаными ХъутIыжъ Азмэт Адыгэ Республикэм и МВД иветеранхэм я Совет ипащ. Ыныбжь зэрэхэкIота­гъэм емылъытыгъэу, тэри, МВД-м ­илъэс пчъагъэхэм хэтыгъэхэу ащ иветеран­хэри, непэ къызынэсыгъэм тыщыгъу­пшэрэп, уахътэ къыхегъэкIышъ, къытхэ­хьэ, тыгу къыдещае, тигумэкI зэрегъашIэ, амалэу щыIэмкIэ IэпыIэгъу къытфэхъу.

Тэ, Тэхъутэмыкъое ыкIи Теуцожь районхэм МВД-м икъулыкъушIэхэу, ащ иветеранэу ащыпсэухэрэмкIэ, тэгугъэ адырэ тирайонхэм яветеранхэми къыддырагъэштэнэу. ХъутIыжъ Азмэт ищы­Iэныгъэ гъогу тыкъытегущыIэнэу типшъэ­рылъэп. Ар зэкIэми ашIэ.

Тызыфаер нэмыкI. Лъытэныгъэшхо зыфэтшIырэ тинахьыжъэу ХъутIыжъ Аз­мэт цIыф бэдэдэ зэкIодылIэрэ коро­навирусыр къеузи, республикэ сымэ­джэщым чIэфэгъагъ. Щынэгъо чIыпIэ ифэгъагъ. Тэри гузэжъогъу тыхэтыгъ. А бэлахьым Азмэт зынаIэ тетыгъэхэу, чIыпIэ къиным изыщи, ылъэ къытезыгъэуцожьыгъэхэм ацIэ къетIонэу тыфай. Ахэр: Роспотребнадзорым республи­кэмкIэ и ГъэIорышIапIэ ипащэу Сергей Завгороднер, республикэ сымэджэщым иврач шъхьаIэу Чэужъ Нателлэ, еIэзэгъэ врачэу Людмила Шопинар, ахэм ягъу­сэгъэ медсестрахэр.

КъатIомэ тшIоигъор ахэм лъэшэу тазэрафэразэр ары. ТафэлъаIо псауныгъэ пытэ яIэнэу, шIоу, дэгъоу, дахэу щыIэр къадэхъунэу, тинахьыжъ лъапIэу, шъхьэкIэфэныгъэшхо зыфэтшIырэ Хъу­тIыжъ Азмэт къинэу тыралъэгъуагъэм иджэуапэу Алахьталэр шIукIэ къятэ­жьынэу. Яунагъохэм хъярырэ гушIуагъо­рэ нэмыкI къарымыхъухьэу, гъотырэ хахъорэ яIэу, ягупсэхэм адатхъэхэу, цIыфхэм япсауныгъэ икъэухъумэн бэрэ фэлэжьэнхэ алъэкIынэу. Азмэт тыфэлъаIо ипсауныгъэ зыпкъ иуцожьынышъ, илъэсыбэрэ ташъхьагъ итынэу.

Тэхъутэмыкъое ыкIи Теуцожь районхэм МВД-м иветеранэу ащыпсэухэрэм яшIоигъоныгъэкIэ тхыгъэр къэзыгъэхьазырыгъэр Нэхэе Рэмэзан.