«Топ-1000 культурных туристиче­ских брендов России» зыфиIорэ зэ­нэкъокъум ипэшIорыгъэшъ зэфэ­хьысыжьхэр къэнэфагъэх. Культурнэ, тарихъ, чIыопс ыкIи гастрономическэ псэуалъэхэу Адыгеир къызэрашIэ­жьы­хэрэр ащ хэхьагъэх.

«Живое наследие» зыфиIорэ зэнэкъокъум къагъэхьыгъэм щыщэу 500-м нахьыбэ жюрим къыхи­хыщтэп.

«Топ-1000 культурных туристических брендов России» зыфиIорэ зэнэ­къокъум къыщыхахыгъэх Адыгеим ибрендхэу: «Сооружения» зыфиIорэмкIэ — «Адыгеим идольменхэр»; «Традиции и промыслы» зыфиIорэ лъэныкъомкIэ — «Адыгэхэм ядышъэ хэдыкIын», «Цый» ыкIи «Адыгэ шыуан», «Адыгэ къашъохэр», «Черкес сэшхо»; «ГастрономиемкIэ» — «Хьалыжъор», «ЧIыопс» зыфиIорэмкIэ — «Лагъо-Накъэ»; «Персона» зыфиIорэмкIэ — «КIэрэщэ Тембот». «Топ- 500 культурных туристических брендов России» зыфиIорэм хэхьа-гъэх «Адыгэ къуаемрэ» «ТыгъэкъохьэпIэ Кавказымрэ».

Адыгэ Республикэм культурэмкIэ и Министерствэ къызэрэщаIуагъэмкIэ, пэшIорыгъэшъ къы­хэ­хыныр аухыгъ. Ащ хэхьагъэхэр гъэтхапэм и 1-м къыщегъэжьагъэу сайтым рагъэхьащтых.

Зэнэкъокъум ишIуагъэ­кIэ культурнэ, чIыопс объ­ектхэр, шэн-хабзэхэр шъолъырхэм къагъэлъагъо, къыраIотыкIы. Порталэу «Живоенаследие.рф» зыфиIорэм ихьэрэ пстэуми ахэр алъэгъунхэ амал яI.

«Топ-1000 культурных и туристических брендов России» зыфиIорэ зэнэ­къокъум кIэщакIо фэхъугъэх УФ-м и Общественнэ па­латэр, Урыс географическэ обществэр, стратегическэ инициативэхэмкIэ Агентствэр, УФ-м культу­рэмкIэ и Министерствэ, Ростуризмэр, Уф-м мэ­къу-мэщ хъызмэтымкIэ и Министерствэ.

Абрэдж Сэтэнай.