ПэшIорыгъэшъ амалхэр Адыгеим зэрэщызэрахьэхэрэм ишIуагъэкIэ коронавирусыр къызэуталIэхэрэм япчъагъэ нахь къеIыхыгъ. ГущыIэм пае, мэзаем и 25-м ар къызэутэлIагъэу агъэунэфыгъэр нэбгыри 7.

Шъугу къэтэгъэкIыжьы зэпахырэ узхэмкIэ республикэм иIофхэм язытет нахьышIу зэрэхъугъэм епхыгъэу шап­хъэу аштэгъагъэхэм ащыщхэр зэрэтырахыжьыгъэхэр. Ащ фэгъэхьыгъэ Указым Адыгэ Республикэм и ЛIышъхьэу КъумпIыл Мурат 2021-рэ илъэсым мэзаем и 18-м кIэтхэжьыгъ.

Адыгеим псауныгъэр къэухъумэгъэнымкIэ и Министерствэ къызэритыгъэм­кIэ, республикэм имуниципальнэ образование пстэуми COVID-19-р къызэуталIэхэрэм япчъагъэ къащеIыхыгъ. Адыгеим иинфекционнэ госпитальхэм къяуалIэрэр нахь макIэ хъугъэ. ТапэкIэ чIыпIэ 1260-рэ яIагъэмэ, джыдэдэм ахэм ачIэтыр пIэкIор 400: Мыекъопэ къэлэ, Инэм сымэджэщхэм пIэкIори 100 зырыз, республикэ инфекционнэ сымэджэщым пIэкIор 200. Гурытэу ыкIи хьылъэу сымаджэхэрэр ары ахэм ачIагъэгъуалъхьэхэрэр.

Зэпахырэ узхэм лъэш дэдэу зыкъызыщаIэтыгъагъэр 2020-рэ илъэсым шэкIогъум и 20-м къыщегъэжьагъэу тыгъэгъазэм и 27-м нэс. Джащыгъум мафэ къэс нэбгыри 100 фэдизмэ COVID-19-р къяуталIэщтыгъ. Тыгъэгъа­зэм и 6-м нэбгыри 109-мэ ащ фэдэ узыр къахагъэщыгъагъ. А лъэхъаным мафэ къэс нэбгырэ 70 — 92-рэ фэдиз стационархэм ащэщтыгъ. 2021-рэ илъэ­сым щылэ мазэм и 15-м къыщегъэжьагъэу коронавирусым ыгъэгумэкIыхэрэм япчъагъэ нахь къе­Iыхэу фежьагъ. 2021-рэ илъэсым мэзаем и 25-м ащ фэдэ узыр къяутэлIагъэу нэбгыри 7 къыхагъэщыгъ.

Зэпахырэ узхэмкIэ республикэм иIоф­хэм язытет нахьышIу зэрэхъугъэм къы­хэкIэу коронавирусым ыгъэгумэкIыхэрэм тапэкIэ къафыхагъэкIыгъэгъэ отделениехэр нэкIы хъужьыгъэх ыкIи ыпэкIэ зэ­рэщытыгъэм фэдэу яIофшIэн зэхащэу аублэжьыгъ. ГущыIэм пае, республикэ проектэу «Тинахьыжъхэр» зыфиIорэм тетэу нэбгырэ 90-м ехъумэ гериатрическэ IэпыIэгъу аратыгъ.

Адыгэ Республикэм и ЛIышъхьэу КъумпIыл Мурат АР-м псауныгъэр къэу­хъумэгъэнымкIэ и Министерствэ нахь пасэу пшъэрылъ фишIыгъагъ планхэм атетэу хирургиемкIэ операциехэр ашIы­хэу, ыпэкIэ зэрэщытыгъэм фэдэу меди­цинэ организациехэм Iоф ашIэу ауб­лэжьынэу.

Республикэм ипащэ джащ фэдэу пшъэрылъ афишIыгъ къоджэдэсхэм япсауныгъэ изытет уплъэкIугъэнымрэ мобильнэ медицинэ бригадэхэм яIофшIэн зыпкъ игъэуцожьыгъэнымрэ лъэшэу анаIэ атырагъэтынэу. Ащ пае мобильнэ комплекси 6 джыри къащэфынэу рахъу­хьагъ. А гухэлъым пае федеральнэ бюджетым сомэ миллион 45,3-рэ къыхагъэкIыгъ.

Мэлылъфэгъум къыщегъэжьагъэу зыныбжь икъугъэхэм диспансеризациер арагъэкIунэу, пэшIорыгъэшъ уплъэкIунхэм ахэр къахырагъэубытэнхэу рахъухьэ. Стационар IэзапIэхэми, амбулаториехэми, поликлиникэхэми графикхэм атетэу Iоф ашIэу рагъэжьэжьыгъ.

Адыгэ Республикэм и ЛIышъхьэ ипресс-къулыкъу