УФ-м и Президентэу Владимир Путиным уIэшыгъэ кIуачIэхэм яIофышIэхэм хэбзэгъэуцугъэм диштэрэ унашъоу къашIырэр зымыгъэцакIэхэрэм тазырэу атыщтыр къэIэтыгъэным фэгъэхьыгъэ тхылъым дыригъэштагъ. Митингхэм ахэлажьэхэрэри ащ къыхеубытэх. ЦIыфыбэ зыщызэхэхьэрэ Iофтхьабзэхэм язэхэщэн пэIухьащт ахъщэм шапхъэу пылъхэр зыукъохэрэм атыщт тазырыри тхылъым къыщыдэлъытагъ.

ЦIыф зэхахьэм хэлажьэу полицием, Росгвардием, оборонэмкIэ Министерствэм е бзэджэшIагъэ зезыхьагъэхэм пшъэдэкIыжь ягъэхьыгъэнымкIэ Федеральнэ къулыкъум яIофышIэ законым диштэрэ унашъоу къышIыгъэр зымыгъэцэ­кIагъэм административнэ пшъэ­дэкIыжьэу ыхьыщтыр гъэлъэшыгъэнэу хэбзэгъэуцугъэм къыщеIо. Тазыр сомэ мини 10-м къыщегъэжьагъэу сомэ мин 20-м нэс, чэщ-зымэфэ 30 хьап­сэу е сыхьат 200-м нэсэу шIокI имыIэу Iоф ышIэнэу тыралъхьанэу щыгъэнэфагъ. НахьыпэкIэ тазырыр сомэ мини 5 зэрэхъущтыгъэр.

Пэщэ IэнатIэм Iутхэм арагъэ­тыщтыгъэр сомэ мини 10 — 20 зэрэхъущтыгъэр, джы ар сомэ мин 20 — 40-м нагъэсыгъ, юридическэ лицэхэм сомэ мин 50 — 100 атыщтыгъэмэ, сомэ мин 70-м къыщегъэжьагъэу сомэ мин 200-м нэсэу атыралъхьащт.

Ащ нэмыкIэу административнэ хэбзэукъоныгъэхэмкIэ УФ-м и Кодекс публичнэ Iофтхьабзэхэм язэхэщэн пэIухьащт ахъщэм иугъоин ыкIи игъэфедэн апылъ шапхъэхэр зыукъохэрэм арагъэ­тыщт тазырхэм ахагъэ­хъуагъ. ЦIыф къызэрыкIохэм сомэ мини 10 — 20 арагъэтыщт, пэщэ IэнатIэм Iутхэм сомэ мин 20 — 40, юридическэ лицэхэм сомэ мин 70 — 200 атыралъхьащт.

Шъугу къэдгъэкIыжьын, мы проектым кIэщакIо фэхъугъэр Урысые политикэ партиеу «Единая Россия» зыфиIорэм идепутатэу Дмитрий Вяткиныр ары.