Адыгеим и ЛIышъхьэу КъумпIыл Мурат АР-м и УплъэкIокIо-лъытэкIо палатэ итхьаматэу Павел Стаценкэм тыгъуасэ IукIагъ. БлэкIыгъэ илъэсым ведомствэм Iофэу ышIагъэм изэфэхьысыжьхэм лъэныкъохэр атегущыIагъэх.

Iофтхьабзэм хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, республикэм и Премьер-министрэ ипшъэрылъхэр зыгъэцэкIэрэ Сапый Вячеслав, финансхэмкIэ министрэм иапэрэ гуадзэу Екатерина Косиненкэр.

Финанс дисциплинэм игъэпытэн палатэм иIахьышIу зэрэхэлъыр, шъолъырым ыпашъхьэ щыт пшъэрылъхэр гъэцэкIэгъэнхэмкIэ ащ иIофшIэн зэрэзэхищэрэм бэ зэрелъытыгъэр Адыгеим и ЛIышъхьэ хигъэунэфы­кIыгъ.

— Лъэпкъ проектхэм, къэралыгъо программэхэм ыкIи шъолъырым социальнэ-экономикэ хэхъоныгъэ ышIыным фытегъэпсыхьэгъэ унэе программэм Адыгеир ахэлажьэ. Къэгъэлъэгъон инхэр тиIэнхэмкIэ пэрыохъоу щыIэхэр зэкIэ дэгъэзыжьыгъэн­хэ, шIуагъэ къытэу IофшIэныр зэхэтщэн фае, — къы­Iуагъ КъумпIыл Мурат.

БлэкIыгъэ илъэсым палатэм Iофтхьэбзи 7 ригъэ­кIокIыгъ. Сомэ миллиарди 2,3-рэ гъэфедагъэ зэрэхъу­гъэр ыкIи сомэ миллиард 1,3-рэ уасэ зиIэ мылъкур зэрагъэзекIуагъэр специалистхэм ауплъэкIугъ. Ахэм язэфэхьысыжьхэмкIэ акт 64-рэ зэхагъэуцуагъ.

УФ-м финансхэмкIэ и Министерствэ зэхигъэуцогъэ рейтингымкIэ лъэныкъоу «Финансовый контроль» зыфиIорэмкIэ 2020-рэ илъэсым анахь балл ин къэзыхьыгъэ субъекти 10-м Адыгеир ащыщ хъугъэ.

Адыгэ Республикэм и ЛIышъхьэ ипресс-къулыкъу.