Хэгъэгум иухъумакIо и Мафэ фэгъэхьыгъэ мэфэкI зэхахьэу АР-м и Къэралыгъо филармоние щыкIуагъэм Адыгэ Республикэм и ЛIышъхьэу КъумпIыл Мурат хэлэжьагъ.

Iофтхьабзэм къекIолIагъэх Къэралыгъо Советым — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Къэралыгъо упчIэжьэгъоу ТхьакIущынэ Аслъан, министрэхэм я Кабинет хэтхэр, депутатхэр, хэбзэухъумэкIо, федеральнэ ыкIи республикэ къулыкъухэм ялIыкIохэр, ныбжьыкIэ армейцэхэр.

Адыгеим и ЛIышъхьэ къэзэрэугъоигъэ­хэм закъыфигъазэзэ, лIыхъужъны­гъэм, щытхъум, Хэгъэгум ыкIи цIыфхэм фэшъып­къэныгъэу афыряIэм мы мэфэкIыр ятамыгъэу зэрэщытыр хигъэунэфыкIыгъ.

— Къэралыгъом ишъхьафитыныгъэ фэбэнэгъэ тинахьыжъхэм зэрахьэгъэ лIыхъужъныгъэр, зэрэдунаеу арагъэлъэгъугъэ зэкъотыныгъэр, зыкIыны­гъэр ыкIи псэемыблэжьыныгъэр мы мафэм тыгу къэтэгъэкIыжьы. ИкIыгъэ илъэсым Хэгъэгу зэошхом ТекIоныгъэ къызщыдэтхыгъэр илъэс 75-рэ зэрэхъугъэр хэдгъэунэфыкIыгъ. Ау пандемием ыпкъ къикIыкIэ тызэмысэгъэ шIыкIэм тетэу ар дгъэмэфэкIыгъ. Ащ пае къэмынэу республикэм ис ветеран пэпчъ тынаIэ зэрэтетыр, тызэрэфэгумэкIырэр зэхишIэнымкIэ тлъэкI къэдгъэнагъэп, — къыIуагъ КъумпIыл Мурат.

Шъолъырым ипащэ рэзэныгъэ гущыIэхэр зыфигъэхьыгъэхэм ащыщых Хэгъэгу зэошхом ыкIи тылым иветеранхэр. ТиныбжьыкIэхэм яхэгъэгу шIу алъэгъоу пIугъэнхэмкIэ, якъэралыгъо итарихъ лъытэныгъэ фашIынымкIэ ахэр щысэтехыпIэх. Зэо зэпэуцужьхэм ахэлэжьагъэхэм, непэ Хэгъэгур къэзыухъу­мэхэрэм шъхьафэу ЛIышъхьэм зафигъэ­загъ.

— Къэралыгъом игъунапкъэхэмрэ ишъхьафитыныгъэрэ къэухъумэгъэнхэр лъэпкъ щынэгъончъэным иIофыгъо шъхьаIэх. Урысыем инеущырэ мафэкIэ пшъэдэкIыжьэу тхьырэр къыдгурыIоным мэхьанэ иI. Якъэралыгъо гупсэ къырыкIощтыр ныбжьыкIэхэм аIэ зэрилъыр агурыдгъэIон фае. МыщкIэ дзэ-патриотическэ пIуныгъэм мэхьанэшхо иI, — къыхигъэщыгъ КъумпIыл Мурат.

АР-м и ЛIышъхьэ зэрэхигъэунэфыкIыгъэмкIэ, шъолъырым ипащэхэм яIоф­шIэн агъэпсынымкIэ ветеран органи­зациехэм, Мыекъопэ дзэ гарнизоным, республикэ дзэ комиссариатым, ДОСААФ-м, хэбзэухъумэкIо къулыкъухэм зафагъазэ. Волонтерхэм, патриотическэ клубхэм, лъыхъон отрядхэм яIофшIэн лъэшэу анаIэ тырагъэты.

Экономикэм хэхъоныгъэ ышIынымкIэ, шъолъырым ыубытырэ чIыпIэм, гъэсэныгъэм, медицинэ IэпыIэгъум язытет зыкъягъэIэтыгъэнымкIэ лъэпкъ пшъэ­рылъхэр зэшIохыгъэнхэм нэбгырэ пэпчъ къыхэгъэлэжьэгъэн фаеу зэрэщытыр Адыгеим ипащэ къыхигъэщыгъ.

— УФ-м и Президентэу Владимир Путиным къыгъэнэфэгъэ пшъэрылъхэм язэшIохын цIыфхэм ящыIэкIэ-псэукIэ нахьышIу шIыгъэным фэIорышIэ, — къыIуагъ КъумпIыл Мурат.

Хэгъэгум иухъумакIохэм республикэм ипащэ къафэгушIозэ, дзэ къулыкъум ыкIи яIофшIэн гъэхъагъэхэр щашIынхэу, ягупсэхэм, къапэблагъэхэм псауны­гъэ пытэ, мамырныгъэ, шIур яIэнхэу къафэ­лъэIуагъ.

Зэхахьэм къыщыгущыIагъэх ыкIи мэфэкIыр хэзыгъэунэфыкIыхэрэм къа­фэгушIуагъэх АР-м и Парламент и Тхьаматэу Владимир Нарожнэмрэ АР-м иветеранхэм я Совет ипащэу Къоджэ Аслъанрэ.

Республикэм итворческэ купхэм, орэдыIохэм къагъэхьазырыгъэ мэфэкI концертымкIэ Iофтхьабзэр зэфашIы­жьыгъ.

Iэшъынэ Сусан.