«Единэ Россием», НыбжьыкIэ гвардием, движениеу «ТекIоныгъэм иволонтерхэр» зыфиIорэм мэзаем и 23-м Iофтхьабзэу «ЛIыхъужъхэм яшIэжь тэжъугъэгъэлъапI» зыфиIорэр зэхащагъ. Хэгъэгум ишъолъырхэм арыс нэбгырэ минипшI заулэ ащ хэлэжьагъ. Ахэм Хэгъэгу зэошхом хэтыгъэхэм ясаугъэтхэм, къош къэхалъэхэм къэгъагъэхэр акIэралъхьагъэх.

Нэбгырэ минитIу фэдизмэ Поклоннэ Iуашъхьэм тет саугъэтым къэгъагъэхэр кIэралъхьагъэх. Урысыем и Президентэу Владимир Путиным, «Единэ Россием» и Тхьаматэу Дмитрий Медведевым, Къэралыгъо Думэм идепутатхэм зыщыщ амышIэрэ дзэкIолIым икъэхалъэ къэгъа­гъэхэр кIэралъхьагъэх.

Движениеу «ТекIоныгъэм иволонтерхэр» зыфиIорэм хэтхэр джащ фэдэу ветеран мини 7-м ехъумэ афэгушIуа­гъэх. Движением и Гупчэ штаб итхьаматэу Ольга Амельченковам къызэритыгъэмкIэ, гуфакIохэм дунаим ихэгъэгу зэфэшъхьафхэм ащыпсэурэ цIыфхэм атхыгъэ письмэ 10000-м ехъур ветеранхэм аратыжьыгъ.

«Адыгеим имуниципалитетхэм арыт саугъэтхэми къэгъагъэхэр акIэралъхьагъэх, «Единэ Россием» хэтхэри респуб­ликэм игуфэкIо объединениехэри, имолодогвардейцэхэри урысые Iофтхьабзэм чанэу хэлэжьагъэх», — къыIуагъ федеральнэ партийнэ проектэу «Тарихъ шIэжь» зыфиIорэм АдыгеимкIэ иобщественнэ совет итхьаматэу, ныбжьыкIэ дзэ-патриотическэ объединениеу «ЗыкIыныгъэм» и Адыгэ республикэ общественнэ организцие итхьаматэу Джарымэ Рэщыдэ.

Джащ фэдэу дзэм къулыкъу щызыхьыхэу Мыекъопэ госпиталым чIэлъхэм аджэжь щыIагъэх, шIухьафтынхэр афашIыгъэх.