ЦIыфхэм зыфаер къыхахынэу
УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм къыдыхэлъытагъэхэр гъэцэкIэгъэнхэм пае аштэгъэ проектэу «Непэрэ шапхъэхэм адиштэрэ къэлэ щыIакIэр гъэпсыгъэныр» зыфиIорэм ипхырыщын АР-м и ЛIышъхьэу КъумпIыл Мурат лъэшэу ынаIэ зытетхэм ащыщ.
Фэтэрыбэу зэхэт унэхэм ящагухэмрэ общественнэ чIыпIэхэмрэ язэтегъэпсыхьанкIэ зэшIохыгъэ хъурэ Iофтхьабзэхэр зэкIэри ащ къыщыдэлъытагъэх.
— Псэуалъэу икIэрыкIэу шIыжьыгъэн, зэтегъэпсыхьэгъэн фаер къыхэзыхырэр цIыфхэр ары. ЧIыпIэр зыгъэфедэщтхэм агу рихьэу, лъэхъаным къыздихьыгъэ шапхъэхэм адиштэу дгъэпсыным пае нэбгырэ пэпчъ ымакъэ тэркIэ мэхьэнэшхо иI, — къыIуагъ КъумпIыл Мурат.
АР-м и ЛIышъхьэ общественнэ чIыпIэу икIэрыкIэу ашIыжьыщтым икъыхэхын пае зэкIэми яшIошI къыраIотыкIын алъэкIынэу мэкъэтынхэр зэхащэнхэу пшъэрылъ къышIыгъ.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, ар гъэцэкIэгъэным фэшI зэкIэми амакъэхэр атынхэ амал яIэнэу шIыкIэ гъэнэфагъэ мыгъэ къаугупшысыгъ. Ащ зэIухыгъэ шIыкIэм тетэуи, пэIудзыгъэуи амакъэхэр атынхэу къыщыдэлъытагъ. Интернет нэкIубгъоу агъэфедэн алъэкIыщтыр: http://1.gorodsreda.ru
Къалэу Мыекъуапэ, поселкэхэу Инэмрэ Яблоновскэмрэ мэкъэтынхэр мэлылъфэгъум и 26-м къыщыублагъэу жъоныгъуакIэм и 30-м нэс ащыкIощтых. Мы уахътэм ащ изэхэщэн Iоф дашIэ. Республикэм ыкIи муниципалитетхэм IофшIэгъу купхэр ащызэхащагъэх, волонтерхэри Iофым къыхэлажьэх.
Джащ фэдэу проектэу «Непэрэ шапхъэхэм адиштэрэ къэлэ щыIакIэр гъэпсыгъэныр» зыфиIорэм ипхырыщын зэрэкIорэр, мэкъэтыныр зэрэщыIэщтыр цIыфхэм алъыгъэIэсыгъэным шъолъырым игъэIорышIэнкIэ АР-м и Гупчи хэлэжьэщт.