Хэгъэгум иухъумакIохэм я Мафэ фэгъэ­хьыгъэм Iофтхьабзэу «Февральские окна» зыфиIорэм хахьэу внедорожникхэм апае Адыгеим къызэдэчъэнхэр щырагъэ­кIокIых.

Мы илъэсым трофи-рейдкIэ заджэхэрэ зэнэкъо­къур мэзаем и 20 — 22-м щыIэнэу щытыгъ. Ау республикэм осышхо къызэрэщесыгъэм къыхэкIэу ар зэкIахьагъ, джы Iофтхьабзэр 2021-рэ илъэсым мэзаем и 26 — 28-м кIощт.

«Февральские окна» зыфиIорэ зэнэкъокъур ыпэкIэ зыщызэхащэгъэ чIыпIэр ары джыри ар зыщырекIокIыщтыр — Мыекъопэ районым ит поселкэу Каменномостскэм. Мы уахътэм ехъулIэу къызэдэчъэным хэлэжьэнхэу экипаж 33-мэ зыкъагъэлъэгъуагъ. Ахэр Ростов-на-Дону, Таганрог, Краснодар, Новороссийскэ, Ермэлхьаблэ, Шъачэ, Лабинскэ, Абинскэ, Новочеркасскэ, Учкекен ыкIи Урысыем икъыблэ шъолъыр икъалэхэм къарыкIыщтых.

Къызэдэчъэн зэнэкъокъум зэфэхьысыжьэу фэхъугъэхэр 2021-рэ илъэсым трофи-рейдымкIэ Краснодар краим щыIэщт чемпионатым иквалификацие халъытэщтых.