Лъэпкъ проектэу «Псауныгъ» зыфиIорэм къыдыхэлъытагъэу адэбз уз зиIэхэм зэряIэзэщтхэ Iэмэ-псымэ 24-рэ 2020-рэ илъэсым республикэм зэригъэгъотыгъ. Ащ сомэ миллиони 116-рэ пэIухьагъ. Мы илъэсым шъолъыр проектэу «адэбз узхэм апэшIуекIогъэныр» зыфиIорэм къыдыхэлъытагъэу аужырэ шапхъэхэм адиштэрэ, благъэу узэреплъын плъэкIыщт рентген, томограф ыкIи зэрахьэрэ УЗИ аппарат къащэфыщт, ащ сомэ миллиони 113-м ехъу тефэнэу агъэнафэ.

Адэбз узхэм зыщяIазэхэрэ клиническэ диспансерым магнит-резонанснэ томограф щагъэуцугъ. Ар аужырэ шапхъэхэм адештэ, ащ ишIуагъэкIэ сымэджэщым къекIуалIэхэрэм ялажьэр нахь къыхэгъэщыгъошIу хъугъэ. Аппаратхэр чIэтынхэу кабинет шъхьаф агъэ­псыгъ. Ахэм афэгъэзэгъэщт специалистхэр рагъэджагъэх.

— МРТ-р зыфашIырэ сымаджэм джы ащ фэдиз нэбзый хэхьащтэп, псауныгъэмкIэ зэрарэу къыхьырэр бэкIэ нахь макI. Джащ фэдэу, уплъэкIун зэфэшъхьафхэр зэу аппаратыкIэмкIэ пшIын олъэкIы, гущыIэм пае, шъхьэкуцIым, тхыкуцIым, пкъынэ-лынэм узэдяплъын олъэкIы, — еIо рентгенологическэ ыкIи УЗИ диагностикэмкIэ отделением ипащэу Кощэгъу Руслъан.

Iэмэ-псымакIэр агъэфедэнэу рагъэжьагъ, ащ сомэ миллион 95-рэ фэдиз ыуас.

(Тикорр.).