Гупчэр къызэIуахынэу агъэнафэ
2021-рэ илъэсым Кощхьэблэ район сымэджэщым адэбз узым пэшIуекIогъэным фытегъэпсыхьэгъэ амбулаторнэ гупчэ (ЦАОП) къыщызэIуахынэу агъэнафэ.
Лъэпкъ проектэу «Псауныгъэм» къыдыхэлъытэгъэ проектэу «Борьба с онкологическими заболеваниями» зыфиIорэм ишIуагъэкIэ ар ашIыщт. Мыщ сымаджэхэм псынкIэу щауплъэкIунхэ ыкIи ящыкIэгъэ IэпыIэгъур ащарагъэгъотын амал щыIэщт.
— Гупчэм пшъэрылъ шъхьаIэу иIэр цIыфым адэбз уз иIэу къызщыхагъэщыгъэм къыщегъэжьагъэу мэфэ 14-м къыкIоцI диагнозыр фэгъэуцугъэныр ары. Нэужым республикэ онкодиспансерым сымаджэр агъэкIощт, къызыкIожьыкIэ лъыплъэщтых, — къыIуагъ Кощхьэблэ район сымэджэщым иврач шъхьаIэу Хъашъэ (Хашев) Заурбый.
Гупчэм аужырэ шапхъэхэм адиштэрэ оборудованиехэр чIэтыщтых. Врач-онкологэу, хэушъхьафыкIыгъэ шIэныгъэ зэзыгъэгъотыгъэ специалистыр ары сымаджэхэм медицинэ IэпыIэгъу языгъэгъотыщтыр. Мэфэ стационарэу иIэм химиотерапие цIыфхэм ащафашIыщт.
Амбулаторнэ гупчэу къызэIуахыщтым ишIуагъэкIэ адэбз уз зиIэр нахь псынкIэу къыхагъэщыщт. Шъугу къэтэгъэкIыжьы, онкологием икъулыкъу хэхъоныгъэ зэришIырэм, мы узым епхыгъэ пэшIорыгъэшъ Iофтхьабзэхэр зэрэрагъэкIокIыхэрэм ишIуагъэкIэ, 2020-рэ илъэсым мыщ илIыкIыгъэм ипчъагъэ проценти 7,2-кIэ нахь макIэ хъугъэ.
Абрэдж Сэтэнай.