Къэралыгъо программэу «Къуаджэхэм хэ­хъо­ныгъэ ягъэшIыгъэныр» зыфиIорэм игъэцэ­кIэн а мылъкур пэIухьащт.

«Къуаджэхэм псэолъакIэхэр къазэрадэтэджэщтхэм имыза­къоу, къоджэдэсхэми ящы­IэкIэ-псэукIэ зыкъиIэтыщт», — къы­Iуагъ «Единэ Россием» исек­ретарь игуадзэ ипшъэрылъхэр уахътэ горэкIэ зыгъэцакIэу Дмитрий Кобылкиным.

Мылъкур IофыгъуитIумэ апэ­Iуагъэхьащт. Сомэ миллиарди 2,4-мкIэ къалэхэм ясоциальнэ инфраструктурэ зырагъэушъомбгъущт. Шъолъыр 22-у мылъку тедзэр зыIукIэщтым хэхьэх Адыгеир, Алтаир, Башкириер, Волгоград, Нижегородскэ, Смоленскэ, Томскэ хэкухэр, нэмыкI­хэр. Шъолъырхэм ащагъэпсыщтых ыкIи ащагъэцэкIэжьыщтых гурыт еджэпIи 9, кIэлэцIыкIу IыгъыпIи 4, культурэмкIэ унэ 18, спорткомплекс заулэ, амбу­латориехэр, музейхэр, газрыкIуапIэхэр, укъэбзалъэхэр. Ащ нэмыкIэу гурыт еджапIэхэм апае автобусхэр, IэпыIэгъу псынкIэ зэрэратырэ машинэхэр къащэфыщтых, IофшIэпIэ чIыпIэ мини 7,5-м ехъуи къызэIуахынэу рахъухьэ.

ФэгъэкIотэныгъэ зиIэ къоджэ ипотекэмкIэ программэм сомэ миллиардым ехъу къыфыхагъэ­кIыгъ. Ащ ишIуагъэкIэ нэбгырэ мин 23-мэ япсэукIэ амалхэр нахьышIу ашIын алъэкIыщт. Мылъку тедзэр къыхамыгъэкIыгъагъэмэ, къоджэдэс мин 12 фэдиз ныIэп ащ фэдэ шIыкIэкIэ IэпыIэгъу зыфэхъунхэ алъэкIыщтыгъэр.

Урысые Федерацием и Премьер-министрэу Михаил Мишустиным Урысыем и Правительствэ изэхэсыгъо къызэрэщиIуа­гъэмкIэ, къэралыгъо программэм хэлажьэ зэрашIоигъомкIэ язаявкэхэр джыри къаIэкIагъа­хьэх, шъолъырхэм а ахъщэм лъэшэу къащяжэ.

Къоджэдэсхэм хэхъоныгъэ зэрашIыщт программэм пае бюджетым сомэ миллиард 31-рэ къыщыдэлъытагъ. НэмыкI къэралыгъо программэхэми а гу­хэлъхэм сомэ миллиарди 186-рэ къафыхагъэкIыщт. А мылъкумкIэ культурэмкIэ унэ 300-м ехъу агъэпсын, культу­рэмкIэ унэ мин фэдиз джырэ шапхъэхэм ади­штэу зэтырагъэ­псыхьан, къоджэ гурыт еджэпIэ 900-м ехъумэ спортым щыпы­лъынхэмкIэ амал­хэр арагъэ­гъотын, автобуси 100-м ехъу ащэфын алъэкIыщт. «Единэ Рос­сием» и Тхьаматэу Дмитрий Медведевым къызэри­IуагъэмкIэ, къуаджэхэм хэхъоныгъэ зэра­шIыщт программэм мылъку къыфыхэгъэкIыгъэным епхыгъэ Iофыгъохэм «Единэ Россиемрэ» Урысые Федера- ци­ем иминистрэхэм я Каби­нетрэ 2021-рэ илъэсым иублэгъу къафагъэзэ­жьыщтых.

Адыгэ Республикэм и Къэра­лыгъо Совет — Хасэм и Тхьаматэу, «Единэ Россием» ифракцие ипащэу Владимир Нарожнэр Адыгеим икъуаджэхэм хэхъоныгъэ зэрашIыгъэм къытегущыIагъ:

— Адыгеим исхэм азыныкъо нахьыбэр къуаджэхэм ащэпсэу ыкIи Iоф ащашIэ. Къуаджэхэм инфраструктурэ дэгъу яIэ, къо­джэдэсхэм ящыIэкIэ-псэукIэ нахьышIу хъу тшIоигъу. Къэралыгъо хабзэм ифедеральнэ, ишъолъыр, имуниципальнэ къу­лыкъухэм къуаджэхэм хэхъо­ныгъэ зэрашIыщт лъэныкъохэр агъэнэфагъэх, ахэм атетэу непэ яIофшIэн зэхащэ. Адыгэ Рес­публикэм и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Мурат япащэу Адыгэ Республикэм икъэралыгъо программэу «Къуаджэхэм хэхъоныгъэ ягъэшIыгъэныр» зыфи­Iорэр Адыгеим щыпхыращы. А программэм ишIуагъэкIэ рес­публикэм щагъэпсых инженер, социальнэ псэуалъэхэр, фельдшер-мамыку IэзапIэхэр, культурэмкIэ унэхэр, унэгъо, спе­циалист ныбжьыкIэхэм псэу­пIэмкIэ амалэу яIэхэр нахьышIу мэхъух. Инвестициехэр мэкъу­мэщым къыхалъхьэх, техно­логие пэрытхэр щагъэфедэх, мэ­къу­мэщым сэнэхьатхэр зыIэ къизыгъахьэ зышIоигъохэм япчъагъэ илъэс къэс хэхъо.

Джащ фэдэу Владимир Нарожнэм къызэрэхигъэщыгъэмкIэ, Адыгэ Республикэм и Къэ­ралыгъо Совет — Хасэр къуа­джэхэм хэхъоныгъэ зэрашIыщт программэр Адыгеим зэрэщагъэцакIэрэм иIофыгъо хэплъагъ ыкIи Урысые Федерацием ишъо­лъырхэм яадминистративнэ гупчэхэр зыдэщыIэ къэлэ кой­хэм ахэхьэрэ рабочэ поселкэ­хэм нэмыкI къуаджэхэм афэ­дэу хэхъоныгъэ ягъэшIыгъэным, программэр загъэцэкIэщт пIа­лъэр лъыгъэкIотэгъэным, шъо­лъырхэм финанс IэпыIэгъоу къаратырэм хэгъэхъогъэным зыщыкIэлъэIурэ тхылъ Адыгэ Республикэм и Къэралыгъо Совет — Хасэм федеральнэ гупчэм IэкIигъэхьагъ.