Узым къызэрэкIичырэм епхыгъэу
Коронавирусыр къызэуталIэхэрэм япчъагъэ къызэреIыхыгъэм, зэпахырэ узхэмкIэ республикэм иIофхэм язытет нахьышIу зэрэхъугъэм япхыгъэу Адыгэ Республикэм иоперативнэ штаб унашъо ышIыгъ COVID-19-м ыпкъ къикIыкIэ шапхъэу аштагъэхэм ащыщхэр техыжьыгъэнхэу. Адыгэ Республикэм и ЛIышъхьэу КъумпIыл Мурат ащ фэгъэхьыгъэ Указым 2021-рэ илъэсым мэзаем и 18-м кIэтхэжьыгъ.
ГущыIэм пае, санитар-эпидемиологие шапхъэхэр къыдалъытэхэ зыхъукIэ, спортивнэ, культурнэ Iофтхьабзэхэм язэхэщэн, цIыфхэм ягъэшхэн, общественнэ транспортым иIофшIэн зэхъокIыныгъэхэр афэхъущтых. Ау республикэм джыри нэгуихъомрэ социальнэ дистанциемрэ ащагъэфедэн фае. ЦIыфхэм азыфагу метрэ 1,5-рэ дэлъыгъэмэ, джы зы метрэ дэлъын фаер. ПэIудзыгъэ шIыкIэм тетэу джыри зыгорэхэм Iоф ашIэщт. Ащ фэдэ IофышIэхэр зэрэхъун фэе пчъагъэр IофшIэн къязытырэм дырагъаштэзэ агъэнэфэщт, зыныбжь илъэс 65-м къехъугъэхэр ары анахьэу ащ фэдэ IофшIакIэр зэрапэсыщтхэр.
ЦIыфэу ачIэфэн ылъэкIыщтым ызыныкъо нахьыбэ къямыкIуалIэ, нэгуихъор, социальнэ дистанциер агъэфедэ зыхъукIэ, культурнэ Iофтхьабзэхэу цIыфхэр жъугъэу зыхэлажьэхэрэр джы зэхащэнхэ алъэкIыщт. Ау банкетхэр джыри зэхащэхэ хъущтэп. Джащ фэдэу къэшъуапIэхэри зэфэшIыгъэщтых. ЦIыфхэр зыщагъэшхэрэ организациехэм ачIэт Iанэхэм азыфагу метрэ 1,5-рэ дэлъын фае, фудкортхэм яIофшIэнкIэ гъунапкъэхэр щыIэжьыщтхэп. Ифэрэм фэдиз общественнэ транспортым исын ылъэкIыщт, ау нэгуихъомрэ социальнэ дистанциемрэ джыри ащ къыщыдалъытэн фае.
Спортивнэ, культурнэ ыкIи нэмыкI Iофтхьабзэхэр ащызэхащэнхэм афытегъэпсыхьэгъэ унэ зэфэшIыгъэхэм санитар-эпидемиологие шапхъэхэр къащыдалъытэзэ, нэгуихъомрэ социальнэ дистанциемрэ ащагъэфедэзэ, ачIэфэн алъэкIыщтым ызыныкъо фэдиз рагъэблэгъэн алъэкIыщт.
Шъугу къэтэгъэкIыжьы Адыгэ Республикэм и ЛIышъхьэу КъумпIыл Мурат Адыгэ Республикэм псауныгъэр къэухъумэгъэнымкIэ и Министерствэ пшъэрылъ зэрэфишIыгъагъэр планхэм атетэу операциехэр ашIэу рагъэжьэжьынэу, ыпэкIэ зэрэщытыгъэм фэдэу медицинэ организациехэм Iоф ашIэнэу. Джащ фэдэу республикэм и ЛIышъхьэ къоджэ псэупIэхэм адэсхэм яуплъэкIунрэ мобильнэ медицинэ бригадэхэм яIофшIэн зыпкъ игъэуцожьыгъэнымрэ лъэшэу анаIэ атырагъэтынэу пшъэрылъ афишIыгъ.
АР-м и ЛIышъхьэ ипресс-къулыкъу