ЦIыфхэм IофшIапIэ ягъэгъотыгъэным ыкIи гъотэу мазэм яIэр къэухъу­мэгъэным афэгъэхьыгъэ предложениеу Урысые политикэ партиеу «Единэ Россиер» кIэщакIо зыфэхъугъэхэр УФ-м и Прези­дентэу Владимир Путиным игъоу, мэхьэнэ ини яIэу ылъытагъ.

Партием ифракциеу УФ-м и Къэралыгъо Думэ хэтым ипащэу Сергей Неверовым зэIукIэгъоу дыриIагъэм ахэр къыщиIотагъэх. ЦIыфхэм IофшIэпIэ чIыпIэхэр ягъэгъотыгъэнхэм фэгъэхьыгъэ хэбзэгъэуцугъэм зэхъокIыны­гъэхэр фэшIыгъэнхэм «единороссхэр» кIэщакIо фэхъугъэх.

А лъэныкъом фэгъэзэгъэ гуп­чэхэм федеральнэ мэхьанэ яIэу шIыжьыгъэнхэ фаеу предложение къахьыгъ. Джащыгъум фэIо-фэшIэ пстэури зэфэдэу цIыфхэм аIэкIэгъэхьагъэ хъунхэу алъытэ. Ащ имызакъоу, шъо­лъыр­хэм мы лъэныкъомкIэ зэ­пхыныгъэ зэдыряIэ хъущт. ГущыIэм пае, цIыфым исэнэхьаткIэ IофшIэн зыщыпсэурэ шъо­лъырым щимыгъотырэмэ, гъунэ­гъу субъектым IофшIапIэ зэрэщыIэм щыгъозэнэу амал иIэщт.

Сергей Неверовым къызэри­IуагъэмкIэ, ахэм афэгъэхьыгъэ гъэтэрэзыжьынхэр хэбзэгъэуцугъэм фэшIыгъэнхэм УФ-м и Къэралыгъо Думэ хэплъэнэу охътэ благъэм къыхалъхьащт.

Владимир Путиным мы предложениехэм къадыригъэштагъ.

— Правительствэри къыхэлажьэзэ мы зэпстэур пхырыщыгъэ зэрэхъущтым Iоф дэшIэгъэн фае, сэри ащ фытегъэ­псыхьэгъэ унэшъо гъэнэфагъэ­хэр къэзгъэхьазырыщтых, — къыIуагъ къэралыгъом ипащэ.

«Единэ Россием» ащ нэмыкIэу джыри зы предложение къыхьыгъ. Банкым кредит къы­Iихыгъэу, чIыфэ къызтефагъэхэм яахъщэ хьыкум приставхэм заубытыжьыкIэ цIыфыр зэрэ­псэун ылъэкIыщт ахъщэ анахь макIэу агъэнэфагъэм къыщымыкIэу къыфагъэнэным ар фэ­гъэхьыгъ. Сергей Неверовым Президентыр къызэрэщигъэгъо­загъэмкIэ, законопроектыр агъэхьазыри УФ-м и Къэралыгъо Думэ хэплъэнэу мэзаем и 11-м къыхалъхьагъ.

— Мыщ хэзыгъэ фэмыхъоу, зырызэу зэкIэ зэхэпфызэ утегущыIэн фаеу щыт, неущырэ мафэм умыхьэу, зэрежьагъэу гъунэм нэсын фае, — къыIуагъ къэралыгъом ипащэ еплъыкIэу фыриIэр къыриIотыкIызэ.

IофшIапIэм джыри Iут пен­сионерхэм япенсие индексацие шIыгъэным иIофи Сергей Неверовым игугъу къышIыгъ. Пре­зидентым пшъэрылъ къафишIыгъэу, мы лъэныкъомкIэ шIыкIэу щыIэхэр УФ-м и Правительствэ къегъэхьазырых. «Единэ Россиеми» предложение гъэнэфагъэхэр афи­гъэхьыгъэхэу ары фракцием ипащэ къызэриIуа­гъэр, ахэр къыщыдалъытэнхэм зэ­рэщыгугъыхэрэми къыкIигъэтхъыгъ.

Пенсионерэу «опекункIэ» алъытэхэрэм ахъщэ тынэу къа­факIорэр индексацие шIыгъэным фэгъэхьыгъэ зэхъокIыныгъэу за­коным фашIыгъэхэми «Единэ Россиер» ары кIэщакIо афэхъугъэр.