«2021-рэ илъэсым икIэлэегъэджэ анахь дэгъу» зыфиIорэ зэнэкъокъур мэзаем и 17-м къыщегъэжьагъэу и 26-м нэс Мыекъуапэ щыкIощт. Республикэм икъэлэ шъхьаIэ икIэлэегъэджэ анахь дэгъухэр ащ хэлажьэх.

Зэнэкъокъур уцугъуитIоу гощыгъэ. Заочнэу ыкIи очнэ–пэIудзыгъэ шIыкIэм тетэу ахэм заушэтыщт.

КIэлэегъаджэхэу зэнэкъокъум хэлажьэхэрэм шIэныгъэу аIэкIэлъыр, сэнаущыгъэу ахэлъыр къызыщагъэлъэгъорэ видео тырахыщт. Апэрэ уцугъом «Методическая мастерская», «Классный час», «Мастер-класс» ыкIи «Урок» зыфиIохэрэм закъыщагъэлъэгъощт. Джащ фэдэу ежьхэм афэгъэхьыгъэ лъэтегъэуцо къашIынэу щыт.

ЯтIонэрэ уцугъом Мыекъопэ къэлэ администрацием гъэсэныгъэмкIэ и Комитет ипащэхэм кIэлэегъэджэ анахь дэгъухэр гущыIэгъу афэхъущтых, гъэсэныгъэм фэгъэхьыгъэ упчIэхэр зэхафыщтых.

Анахь дэгъухэр къыхэзыхыщт жюрим хэтыщтых гъэсэныгъэмкIэ комитетым, профсоюзым ыкIи гъэсэныгъэм епхыгъэу Iоф зышIэхэрэм ялIыкIохэр. Зэнэкъокъум изэфэхьысыжьхэр мэзаем ыкIэм къэнэфэщтых, ащ текIоныгъэ къыщыдэзыхыгъэхэр республикэ зэнэкъокъум хэлэжьэщтых.

ДЕЛЭКЪО Анет.