ЗипсауныгъэкIэ ауж къинэрэ сабыйхэм ящыIэкIэ-псэукIэ нахьышIу шIыгъэным, ахэр щыIэныгъэм хэгъэгъозэгъэнхэм республикэм лъэшэу анаIэ щытет, ащ фытегъэпсыхьэгъэ федеральнэ программэхэми Iоф ашIэ.

ГущыIэм пае, «Iэрыфэгъу щыIакI» зыфиIорэ программэм къыдыхэлъытагъэу Мыекъуапэ дэт кIэлэцIыкIу IыгъыпIэу N 4-р бэмышIэу зэтырагъэпсыхьагъ, сэ­къатныгъэ зиIэ сабыйхэм япIу­ныгъэ, ягъэсэныгъэ нахьышIу шIыгъэнымкIэ ищыкIэгъэ Iэ­мэ-псымэхэр зэрагъэгъотыгъэх. Мы гъэсэныгъэм иучреждение зипсауныгъэкIэ ауж къинэрэ нэбгырэ 15 къекIуалIэ. Ахэм япIун, ягъэсэн джы кIэлэпIумэ нахь псынкIэ къафэхъущт, аужырэ шапхъэхэм адиштэрэ Iэмэ-псымэу зэрагъэгъотыгъэм ишIуагъэкIэ кIэлэцIыкIухэм яеджэгъу сыхьатхэр нахь гъэшIэгъонэу, джэгукIэ шIыкIэм тетэу афызэхащэх, хэушъ­хьафыкIыгъэ программэхэмкIэ Iоф адашIэ. Джащ фэдэу логопедым ыкIи психологым якабинетхэр зэтырагъэ­псы­хьагъэх.

КIэлэцIыкIу IыгъыпIэм ипащэу ПсыIушъо Марзет къызэри­IуагъэмкIэ, сэкъатныгъэ зиIэ сабыйхэу мыщ къекIуалIэхэрэм шIэныгъэу арагъэгъотырэм джы нахь хагъэхъощт. Аужырэ шапхъэхэм адиштэрэ Iэмэ-псымэхэр зэрэзэрагъэ­гъоты­гъэхэм ишIуагъэкIэ хэушъхьа­фыкIыгъэ егъэджэн сыхьатхэр афызэхащэх.

Джащ фэдэу учреждением гъэцэкIэжьын мыинхэр ра­шIылIагъэх. Сэкъатныгъэ зиIэхэр зэрэчIэхьащт пандусхэр агъэ­уцугъэх, пчъэхэр зэблахъугъэх, пчъашъхьэхэр зэщызы ашIыгъэх. ЗэкIэмкIи федеральнэ, рес­публикэ ыкIи муниципальнэ бюджетым къыхэхыгъэ сомэ мин 700-м ехъу мы кIэлэцIыкIу IыгъыпIэм изэтегъэпсыхьан пэIухьагъ.

ДЕЛЭКЪО Анет.