2020-рэ илъэсым Адыгеим щыпсэухэрэм чIыфэу банкхэм къаIахыгъэр сомэ миллиард 33-м ехъу. ЗэпстэумкIи физическэ лицэхэм ателъыр сомэ миллиард 47,6-рэ мэхъу. Ыпэрэ илъэсым мыщ фэдэ иуахътэ къыщегъэжьагъэу пштэмэ, процент 11,7-рэ хэхъуагъэу мэхъу.

ПсэукIэ амалхэр нахьышIу шIыгъэнхэм пае ипотекэу агъэпсырэм фэдэ 1,2-рэ хэ­хъуагъ, ахъщэкIэ къэплъытэмэ, сомэ миллиард 15,2-м нэсыгъ. 2020-рэ илъэсым ар зыгъэпсыгъэр нэбгырэ мини 3,2-рэ, ахэм сомэ миллиарди 6,2-рэ къаратыгъ.

— ЦIыфхэм псэупIэ зэрагъэгъотынымкIэ е яIэм зырагъэушъомбгъунымкIэ ипотекэм ишIуагъэ лъэшэу къэкIо, — къыIуагъ Урысые Банкым и Къыблэ ГъэIорышIэпIэ шъхьаIэ и Къутамэу АР-м щыIэм ипащэу Сергей Самойленкэм. — Кредитхэм ятын Урысые банкым нахь къызэригъэшъэбагъэр, УФ-м и Правительствэ ипотекэмкIэ фэгъэкIотэнхэр къызщыдэлъытагъэхэ программэм кIэщакIо зэрэфэхъугъэр чIыфэхэм процентэу атехъорэр нахь макIэ хъуным фэIорышIагъэх, цIыфхэм нахь къызIэкIэгъэхьэгъошIу афашIыгъ. Зы илъэскIэ Адыгеим ипотекэу щатырэм ипроцентхэр 2,2-кIэ къеIы­хыгъ ыкIи тыгъэгъэзэ мазэм 6,9-м къэсыгъ.