«Краснодар» Краснодар — «Динамо» Загреб — 2:3 (1:1). Мэзаем и 18-м Краснодар щызэдешIагъэх.

Къэлапчъэм Iэгуаор дэзыдза­­гъэхэр: Петкович — 15, 54, А-Тимвен — 75 — Динамо». Берг — 28, Классон — 55 — «Краснодар».

Европэм футболымкIэ илигэ Кубокыр къыщыдэхыгъэным фэгъэхьыгъэ зэIукIэгъум уеплъынкIэ гъэшIэгъоныгъэми, кIэухэу фэ­хъугъэм тегъэгумэкIы.

«Краснодар» икъэлэпчъэIут шъхьаIэу Мат­вей Сафоновым шъобжыр икъоу ыгъэхъу­жьыгъэп, ащ къыхэкIэу зэIукIэгъум хэлэжьагъэп. Евгений Городовым опыт ин иIэми, ешIэгъум IэпэIэсэныгъэу къыщигъэлъэгъуагъэм тигъэрэзагъэп. Апэрэ ыкIи ящэнэрэ Iэгуаор тикъэлапчъэ «Динамэм» къызэрэдидзагъэм Е. Городовым илажьэ хэлъ. Арэу щытми, ухъумакIохэр нахь тэгъэмысэх. Дэгъу апэкIэ ахэр илъыхэу бэрэ зэрэт­лъэгъухэрэр шъхьае, яIофшIэн шъхьаIэ икъоу агъэцакIэрэп, къызэкIэкIожьынхэу игъо ифэхэрэп. ЕтIани анахьэу къыхэдгъэщырэр «Краснодар» иухъумакIохэр «Динамэм» иешIакIохэм пытэу апэуцунхэ зэрамылъэкIырэр, гуфит-шъхьафитэу къэлап­чъэм къызэрэдагъаохэрэр ары.

Гупчэм «Краснодар» дэеу щешIагъэп, ыпэкIэ зилъыкIэ, «Динамэр» чIыпIэ къин бэрэ ридзэщтыгъ. Арэу щытми, къэлапчъэм дэощтыр, зэхэщэн Iофыгъоу агъэцэкIагъэр къэлапчъэм дэжь щытыхэу гъунэм нагъэсыщтыгъэп.

М. Берг ыкIи В. Классон дахэу, IэпэIэсэныгъэ ин ахэлъэу «Динамэм» икъэлапчъэ Iэгуаор дадзагъ. Р. Кабеллэ ыпэкIэ ытыгъэ Iэгуаом М. Берг лъычъи, В. Классон зыдэщыт чIыпIэр зэригъэлъэгъугъ, Iэгуаор ащ IэкIигъэхьагъ. Виктор зэресагъэу, ухъума­кIохэм анахь псынкIэу гупшыси, хъагъэм Iэгуаор дидзагъ.

Пчъагъэр 2:3 зэхъум, «Краснодар» текIоныгъэм нахь пхъашэу фэбэнагъ, ау «Динамэм» икъэлапчъэ екIурэ гъогухэр къы­гъотыгъэхэп. МашIор нэм къыкIихэу ешIэныр нахьыжьэу ригъэжьэн зэрэфэягъэр къэ­лъэгъуагъ.

ЕшIэкIо IэпэIасэу Магомед Сулеймановыр ешIэгъум иегъэжьэгъум зэIукIэм зэрэ­хэлэжьагъэм шIуагъэ къыхьыгъэу ­тлъытэрэп. ЯтIонэрэ едзыгъом ар ешIапIэм къихьэмэ шIуагъэу къыхьырэр нахьыб. «Краснодар» икапитанэу Александр Мартыновичыр ухъу­мэн Iофыгъохэм нахьышIоу афэбанэ зыхъу­кIэ, командэр текIоныгъэм фэкIоным нахь фэхьа­зырыщт.

«Динамэм» итренер шъхьаIэу Зоран Ма­мич зэIукIэгъум ыгъэрэзагъ. «Краснодар» итренер шъхьаIэу Мурад Мусаевым IофшIэныбэ ыпэкIэ щыI.

Мэзаем и 25-м командэхэр ятIонэрэу Загреб щызэIукIэщтых, текIоныгъэр къы­дэзыхырэр зэнэкъокъум щылъыкIотэщт.