«АГУ-Адыиф» Мыекъуапэ — «Ставрополье» Ставрополь — 33:31 (19:16). Мэзаем и 17-м АР-м испорт Унэшхоу Кобл Якъубэ ыцIэ зыхьырэм щызэдешIагъэх.

«АГУ-Адыиф»: къэлъэпчъэIутхэр: С. Ко­жубековар, Баскаковар; ешIакIохэр: Клименкэр — 3, Краснокутскаяр, Кирилловар, Серадскаяр, Богдановар — 7, Измайловар — 8, Куцеваловар — 4, Дмитриевар — 4, Коблыр — 3, Ю. Кожубековар, Стрельцовар — 4.

Командэхэм зэнэкъокъум чIыпIэу щаIыгъыр тIэкIу зэпэчыжьэми, «Адыифыр» хэпшIыкIэу нахь дэгъоу ешIагъ. ЗэIукIэгъур зырагъажьэм, пчъагъэр зэрэлъыкIуатэщтыгъэр: 3:2, 7:8. Я 18-рэ такъикъым зэфэдэ хъугъэ — 11:11. Я 24-рэ такъикъым нахь тырэхьатыгъ — 16:14.

«Адыифыр» я 43-рэ такъикъым 26:21-у текIощтыгъ, ау «Ставропольем» икIэрыкIэу ешIэкIэ дэгъу къегъэлъагъо, хъагъэм Iэгуаор заулэрэ редзэ — я 50-рэ такъи­къым пчъагъэр зэфэдэ мэхъужьы — 27:27.

зэIукIэгъур аухынымкIэ такъикъи 5 къэна­гъэу «Адыифыр» хьакIэхэм апэ ишъыгъ — 31:30. «Ставропольер» текIоныгъэм ишъыпкъэу фэбанэ. В. Сутягинам тиешIакIо­хэм якъэлапчъэ Iэгуаор къыдедзэ — 31:31.

«Адыифыр» зэгурыIоныгъэ хэлъэу ыпэкIэ илъыгъ, я 58-рэ такъикъым Ангелина Куцеваловам «Ставропольем» икъэлапчъэ Iэгуаор дедзэ — 32:31-рэ.

Гандболым текIоныгъэр къыщыдэзыхыщтыр къэшIэгъуае. Ар хьакIэхэм къыда­лъыти, тикъэлапчъэ благъэу къекIухэу рагъэ­жьагъ. А уахътэм «Адыифым» ухъумэн Iофыгъохэр дэгъоу ыгъэцэкIагъэх.

ЗэIукIэгъур аухынымкIэ нэгъэупIэпIэгъуи 10 къызэнэм, тиешIэкIо ныбжьыкIэхэм ащыщэу Ангелина Куцеваловам Iэгуаор псынкIэу къызыфигъэфеди, «Ставропольем» икъэлапчъэ дидзагъ, текIоныгъэр зыхьыщтымкIэ упчIэ щымыIэжьы хъугъэ — 33:31-рэ.

ЕплъыкIэхэр

— ЕшIэгъум текIоныгъэр къыщыдахыным типшъашъэхэр фэхьазырыгъэх. «Ставропольем» иамалхэр пэшIорыгъэшъэу зэдгъэшIагъэх, — къытиIуагъ «Адыифым» итренер шъхьаIэу, Адыгэ Республикэм изаслуженнэ тренерэу Никита Голуб. — Ухъумэн Iо­фыгъохэр дэгъоу агъэцэкIэнхэ амылъэкIэу тиешIакIохэм уахътэ къякIугъ, «Адыифыр» ыпэкIэ зилъыкIэ, къэлапчъэм Iэгуаор ди­дзэным фэшI шIыкIэшIухэр къыгъотыщты­гъэхэу сэлъытэ. «Адыифым» «Ставропольер» ебгъапшэмэ, хьакIэхэм якомандэ къыхэщыгъэх В. Юрьевар, гъогогъуи 8 къэлапчъэм Iэгуаор дидзагъ. А. Хвостуновар, В. Сутягинар, нэмыкIхэри дэгъоу ешIагъэх.

ЕшIэгъухэр

«Астраханочка» — «Кубань» — 22:23, «Лада» — «Динамо» — 34:18, «Рос­тов-Дон» — «Звезда» — 33:26. ЧIыпIэхэр 1. «Ростов-Дон» — 32 2. ЦСКА — 30 3. «Лада» — 30 4. «Астраханочка» — 26 5. «Звезда» — 26 6. «Кубань» — 22 7. «Ставрополье» — 14 8. «Университет» — 12 9. «АГУ-Адыиф» — 9 10. «Динамо» — 7 11. «Уфа» — 4 12. «Луч» — 4.

ШъунаIэ тешъудз: «Ростов-Доным» ешIэгъу 16 иIагъ, ЦСКА-м — 18, «Ладэм» — 19, «Астраханочкэм» — 19. «Адыифыр» мэзаем и 23-м Уфа щешIэщт. Тигандбол командэ мэфэкIым ти­гъэгушIонэу фэтэIо.