Тызэмысэгъэ осышхоу ыкIи чъыIэу Адыгеим къэкIуагъэм мы мэфэ зэ­кIэлъыкIохэм нахь загъэпытэ. Синоптикхэм къызэратырэмкIэ, джыри мы тхьамафэр екIыфэ аущтэу щытыщт. Арышъ, Адыгеим и Къэралыгъо автоинспекцие цIыфхэм зафегъазэ сакъыныгъэ къыз­хагъэфэнэу, зэпэчыжьагъэу машинэхэм азыфагу илъын фаер шIокI имыIэу къыдалъы­тэнэу ыкIи инэу мызечъэнхэу. Мы уахътэ гъогу патруль къулыкъум иIофышIэхэр гъогурыкIоным хэлажьэхэрэм зэ­пымыоу алъэплъэх, ищыкIэгъэ IэпыIэгъур арагъэгъоты. Хэгъэу­нэфыкIыгъэн фае, къулыкъу транспортым ыкIоцI ищыкIэгъэ пкъыгъохэр илъых, осым хэнэгъэ автомобильхэр къызэрэхащыжьыщт гъучIыч кIапсэхэм анэсыжьэу. Гъогу транспорт хъугъэ-шIагъэхэм ятхын пэIухьэрэ уахътэр нахь макIэ шIыгъэным пае а купхэм яIофшIэн агъэлъэшыгъ. Автомобильхэр зэрыкIорэ гъогухэу осыр зыщызэтырихьэрэ чIыпIэхэр полицейскэхэм къыхагъэщых ыкIи ащ фэгъэзэгъэ къулыкъухэм къэбарыр алъа­гъэIэсы. Осыр зытхъурэ техникэм иIоф­шIэн пэрыохъу шъуафэмыхъуным пае унэе автомобильхэр гъогу напцэхэм къа­Iушъумыгъанэх. Мэзаем и 16-м республикэм игъогухэм аварие 21-рэ къатехъухьагъ, цIыф хэкIодагъэп. Нахьыбэр зыщыхъугъэхэр Тэ­хъутэмыкъое районымрэ Мые­къуапэрэ (10 ыкIи 4). Адыгеим и Къэралыгъо автоинспекцие къушъхьэхэм якIурэ гъогум ыкIи М-4 «Дон» зыфиIорэм язытет инэплъэгъу ригъэкIырэп. ЗэрэчъыIэм къыхэкIыкIэ ­псауныгъэм изытет къызэщыкъон зэрилъэкIыщтыр, ащ фэшI водительхэр зылъыплъэжьынхэу гъогу инспекцием закъыфегъазэ. ЛъэсрыкIохэми мы мафэхэм гъогу зэпырыкIыпIэхэм са­къыныгъэ нахь къызщыхагъэ-фэн фае. Осышхом къыхэкIыкIэ машинэр зезыфэхэрэм алъэ­гъурэр нахь макIэ зэрэхъугъэм пае нэфынэр къэзытырэ пкъыгъохэр жъугъэфедэнхэу зыщышъумыгъэгъупш. Амал зэриIэкIэ шъуизекIон нахь макIэ шъушIы.