— Урысыем ыкIуачIэ хэхъо зэпыт, ар къызэтыраIажэмэ зышIоигъохэри нахь чан мэхъух. Зыпкъ тыкъиуцуи, тлъакъо ты­къы­теуцонэу зетэгъажьэм, ар зыгу темыфэхэрэр тауж къихьагъэх. Нахь лъэш тызыхъукIэ, мы политикэми нахь хагъахъо, — къыщиIуагъ УФ-м и Президентэу Владимир Путиным къэбар жъугъэм иамалхэм яредактор шъхьа­Iэхэм зэIукIэгъоу адыриIагъэм. Урысыем хэхъоныгъэ­хэр зэришIыхэрэр зыгу темыфабэ щыI. Ахэм Iэ­нэтIэ фалIэ лIэхэу, шIыкIэ пстэур агъэфедэзэ ащ фэбанэхэрэр агъэфе­дэх. Джырэблагъэ хэ­бзэ­гъэуцугъэр аукъозэ чIы­пIэ зэ­фэшъхьафхэм цIыфхэр зэращызэхащэгъагъэхэм еплъыкIэу фыриIэр къыриIотыкIызэ ар къыхигъэщыгъ къэралыгъом ипащэ. ЦIыфхэр блэкIыгъэ уахъ­тэм ящыIэныгъэ зы­фэдагъэм нахьри, неущ къэхъущтым нахь егъэгу­мэкIых. Ар нахьышIу хъу­ным пае шIагъэ хъугъэр ары хабзэм иIофшIэн уасэ зэрэфашIырэр. УФ-м и Президент кIэщакIо зыфэ­хъугъэ лъэпкъ проектхэр неущырэ мафэр нахьышIу хъуным фэIорышIэх. Ари къэралыгъом ипащэ ипса­лъэ къыщыхигъэщыгъ. — Пандемием илажьэми, нэмыкI ушъхьагъу иIэми, цIыфхэр нахь дэеу щыIэ хъугъэх, Iофыгъуабэ яI, ахъщэр афигъэкъу­рэп. Арышъ, цIыфхэм ягу­кIае къыдгурыIон фае. А зэпстэумэ щэIагъэ ямы­Iэжьэу, зэкIэмэ агу агъапэу, хабзэр, пащэхэр афэмылъэгъужьыхэу ашIыгъэх. Европэу, КъохьапIэу Урысыем ыкIуачIэ зэрэхэхъуагъэр зыгу темыфэхэрэми ар агъэфе­дэнэу мэуцух. Мыщи ащ фэдэхэр исых… Ахэми агъэфедэ… Коронавирусыр къызежьэм зыпари тфэмышIэнэу, зыми тыримыуасэу къашIошIыгъ. Тэ тфэшIагъ. Адрэ къэралыгъохэм анахьыбэуи, анахьышIоуи ты­пэшIуекIошъугъ, — къыкIигъэтхъыгъ Президентым. Урысыем щыпсэоу ар къызэуалIэхэрэм япчъагъэ нэбгыришъэ пэпчъ телъытагъэу пштэ­мэ, нэбгырэ 12 зэрэхъурэр. КъохьапIэм а пчъагъэр 45-м непэ къызнэсыгъэм къыщы­кIагъэп. Зэпахырэ узыр къызежьакIэм егъэпшагъэмэ, ви­русым цIыфыр щызыухъумэрэ пкъыгъохэр, щыгъынхэр фэдэ 20-кIэ нахьыбэу Урысыем къыдигъэкIы хъугъэ. Псауныгъэм икъэухъумэн исистеми, Европэм икъэралыгъохэм ыкIи США-м ягъэпшагъэмэ, бэкIэ нахь псын­кIэу ащ пэшIуекIоным зыты­ригъэпсыхьашъугъ. — Урысыем ишIэныгъэлэжьхэм вакцинэр къаугупшысыгъ. Ар гъэхъэгъэшхоу щыт, ау а зыр арэп гъэхъагъэу тиIэр, бэ мэхъух ахэр… Ары агу темы­фэрэр, къызэрэзэ­тыраIэжэщт политикэр къыра­хьыжьэным ушъхьагъоу фэ­хъурэр, — къы­Iуагъ Владимир Путиным. Мэкъумэщ хъызмэтым щылажьэхэрэм гъэхъагъэу яIэхэм уарыгушхон зэратефэрэми къэ­ралыгъом ипащэ къыкIигъэт­хъыгъ. Ащи хэбзэ къулыкъухэм яшIушIагъэ хэлъ, сыда пIомэ, къэралыгъом IэпыIэгъу зэфэ­шъхьафыбэу аритырэр мыхъумэ, язакъоу ащ фэдэ пчъагъэ­хэм мэкъумэщышIэхэр къа­фэкIонхэ алъэкIыщтыгъагъэп. Лэжьыгъэм идунэе бэдзэршIыпIэ уасэу илъхэр зыщыдэкIуаехэрэ лъэхъаным коцыр IэкIыбым зэрагъакIорэм суб­сидиехэр пэIубгъэхьанхэр мы­тэрэзэу Владимир Путиным елъытэ. Мыщ дэжьым чIыдагъэм пылъхэр щысэу къыщи­хьыгъэх. — ЧIыдагъэм идунэе бэ­дзэр­шIыпIэ уасэу илъыр зэрэ­дэ­кIоя­гъэм фэшI чIэнагъэхэр ашIы­хэу, ащ пае джа осэ дэ­дэхэмкIэ мыщ щыIуагъэкIын фаеу алъытагъ. Сыд чIэнагъ ашIырэр? Ары, къаIэкIэхьан фэя­гъэм джы­ри тегъэхъуагъэу, фэдэ пчъагъэкIэ нахьыбэу къа­Iэ­кIэ­хьа­гъэп, ау чIэнагъэ ашIыгъэу зэраIорэм Iофыр тетэп, — ­къыIуагъ Владимир Путиным. Джащ фэдэу УФ-м и Президент IэкIыб интернет нэкIуб­гъошхохэми ягугъу къышIыгъ. Ахэм ачIыпIэкIэ Урысыем ежь иехэр егъэпсых. А ыгъэпсыхэрэр цIыфхэм къызIэкIэгъэхьэгъошIу афэмыхъухэу, икъоу зэтемыгъэу­цуагъэхэу IэкIыб нэкIубгъохэр зэфамышIыщтхэу ары къэралыгъом ипащэ къызэриIуагъэр. — Ушъхьагъу щымыIэу, ар къэсыугупшысынышъ, сиягъэ яз­гъэкIынэу сэ сшъхьэкIэ сыфаеп. Ау къытпэшIуекIохэу, къы­тэпыйхэу къырагъажьэмэ, ащ фэди хэхъухьан ылъэкIыщт. Тихэгъэгу къыпэуцужьыхэмэ зыпарэми зэрафэтымыдэщтыр гъэнэфагъэ, — къыкIигъэтхъыгъ Владимир Путиным.