Юридическэ Iофтхьабзэхэр зезыхьан фимытхэм унэ къазэраратырэ шIыкIэр Урысые Федерацием и Конституционнэ Хьыкум къызэхифыгъ

ПсэупIэхэмкIэ Кодексым ия 57-рэ статья ия 2-рэ Iахь ия 3-рэ пунктрэ Федеральнэ законэу «Сэкъатныгъэ зиIэхэу Урысые Федерацием исхэр социальнэу зэраухъумэхэрэм ехьылIагъ» зыфиIорэм ия 17-рэ статья ия 3-рэ Iахьрэ Урысые Федерацием и Конституцие дештэхэмэ зеуплъэкIум, Урысые Федерацием и Конституционнэ Хьыкум 2021-рэ илъэсым мэзаем и 1-м ышIыгъэ унашъоу N 3-м мыщ фэдэ зэфэхьысыжьым къыщыфэкIуагъ. Апэрэ правовой актым къызэрэщыдэлъытагъэмкIэ, социальнэ наймым изэзэгъыныгъэкIэ хэужъыныхьэгъэ уз хьылъэхэр зиIэхэм чэзыум хэмытхэу унэ къараты. ЯтIонэрэ правовой актым зэритымкIэ, сэкъатныгъэ зиIэхэу, сабый сэкъатхэр зэрыс унагъохэу зипсэукIэ амалхэр нахьышIу зыфашIынэу зытефэхэрэм, 2005-рэ илъэсым щылэ мазэм и 1-м ыуж учетым уцугъэхэм Урысые Федерацием псэупIэхэмкIэ ихэбзэгъэуцугъэ диштэу унэ араты. Астрахань щыщ бзылъфыгъэу Г-м Урысые Федерацием и Конституционнэ Хьыкум зыкъыфигъэзагъ. Зыныбжь икъугъэ, сэкъатныгъэ зиIэ пхъур зэрыс унагъор зипсэукIэ амалхэр нахьышIу зыфашIынэу зытефэхэрэм ячэзыу 2012-рэ илъэсым къыщегъэжьагъэу хэт. Пхъум имызакъоу, ащ къыдекIокIырэ ны-тыхэми унэ къаратыным кIэдэоу хьыкумхэм пчъагъэрэ ащ зафигъэзагъ. Зышъхьэ Iофхэр зыфыземыхьажьхэрэм къадекIо­кIыхэрэм чэзыум хэмытхэу унэ къаратынэу фитыныгъэ ямыIэу хьыкумхэм алъытагъ. Пхъум къыратыгъэ унэм ныри тыри щыпсэунхэмкIэ зи пэрыохъу щымыIэу къа­раIуагъ. Ау бзылъфыгъэу Г-м ар Урысые Федерацием и Конституцие пэшIуекIоу, юридическэ Iофтхьабзэхэр зезыхьан фимытхэми, ахэм къадекIокIыхэрэми яфитыныгъэхэр аукъуагъэу ылъытагъ. Конституционнэ Хьыкумым цIыфхэм джыри зэ агу къегъэкIыжьы къэралыгъор сэкъатныгъэ зиIэхэм IэпыIэгъу афэхъун зэрэфаер, хэужъыныхьэгъэ уз хьылъэ зиIэу, юридическэ Iофтхьабзэхэр зэрихьан фимытэу алъытагъэм ыкIи ренэу къызыдекIокIын фаеу щытым, сэкъатныгъэ зиIэм чэзыум хэмытэу унэ къы­ратын фаеу псэупIэхэмкIэ Кодексымрэ сэкъатныгъэ зиIэхэр социальнэу зэраухъумэхэрэм ехьылIэгъэ законымрэ зэрарытхагъэр ащ къызэхифыгъ. Юридическэ Iоф­тхьабзэр зезыхьан фимытми, ащ ифитыныгъэ­хэр къэзыгъэгъунэхэрэми социальнэ наймымкIэ зы зэзэгъыныгъэм тетэу унэ къаратын зэралъэкIыщтми Конституционнэ Хьыкумыр еуцолIэ­жьыгъ. Ау арэущтэу зыхъурэр зэгъорэ дэд. Урысые Федерацием и Конституционнэ Хьыкум зэрилъыта­гъэм тетэу Урысые Федерацием псэупIэхэмкIэ и Кодекс ия 57-рэ статья ия 2-рэ Iахь ия 3-рэ пункт агъэфедэн фае. Г-мрэ ащ ыпхъурэкIэ унашъоу аштагъэхэм икIэрыкIэу ахэплъэ­жьынхэ фае.

Адыгэ Республикэм и Конституционнэ Хьыкум исекретариат