КъулыкъушIэм пэуцужьыгъэр агъэмысагъ
Илъэс 32-рэ зыныбжь хъулъфыгъэу Тэхъутэмыкъое районым щыщыр джырэблагъэ агъэмысагъ. Урысыем и Уголовнэ кодекс истатьяу «Хэбзэ къулыкъушIэм илIыкIо кIуачIэкIэ ебэныгъэмэ» зыфиIорэм къыдыхэлъытагъэу ащ лажьэ иIэу алъытагъ.Мы хъугъэ-шIагъэр зыхъугъэр 2020-рэ илъэсым гъэтхапэр ары. Ащыгъум Урысыем хэгъэгу кIоцI IофхэмкIэ и Министерствэ иотделэу Тэхъутэмыкъое районым щыIэм идежурнэ часть Яблоновскэм щыщ бзылъфыгъэм зыкъыфигъэзагъ. Ащ къариIуагъ къатыбэу зэтет унэм хэт фэтэрым ибысымхэм общественнэ рэхьатныгъэр зэраукъорэр. Мы Iофым ишъыпкъапIэ зэхафыным фэшI бзылъфыгъэм къариIогъэ чIыпIэм полицием икъулыкъушIэхэр кIуагъэх. Рэхьатныгъэр амыукъонэу къулыкъушIэм бысымым зыреIом, хъулъфыгъэ ешъуагъэм кIуачIэ къызфигъэфеди полицием иIофышIэ къеуагъ. Хэбзэ къулыкъушIэм ылъэныкъокIэ мыщ фэдэ зекIуакIэр зэрэзэрихьагъэм къыхэкIэу хъулъфыгъэр агъэмысагъ. Урысыем и Следственнэ комитет иследственнэ ГъэIорышIапIэу Адыгэ Республикэм щыIэм и Тэхъутэмыкъое межрайон следственнэ отдел къыугъоигъэ тхылъхэр яIэубытыпIэу уголовнэ Iоф къызэIуихыгъ ыкIи бзэджашIэм илъэситIу хьапс тырилъхьагъ.